Misaun ONU Remata; “UNPOL Baucau Fa’an Sasan Ba Komunidade”

.

Jornal Timor Post - Tersa-feira, 06 Novembru 2012 

Polisia Nasoens Unidas iha Timor Leste (UNPol) ne’ebe mak durante ne’e servisu iha Distritu Baucau fa’an sasan ba komunidade, liu-liu area aeroportu Lanud Baucau fa’an sasan ba komunidade sira, tamba Dezembru tinan ne’e remata ona sira nia misaun iha Timor Leste. 

Mandatu Organizasaun Nasoens Unidas Integrasaun ba TL (UNMIT) sei remata iha fulan Dezembru 2012, tanba ne’e, UNPol komesa hamenus sasan ne’ebe maka durante ne’e sira iha, liu husi negosiasaun ba komunidade sira. Iha loron 4 fulan Novembru, hafoin fila husi finadu iha Aeroportu Lanud Baucau, UNPol kuaze nain 20 resin hamrik tuir rede moru nian, fa’an sasan ba komunidade sira ne’ebe maka liu motor no kareta. 

“Malae sira fa’an roupa hanesan farda, sapatu, faru no sasan seluk ho folin baratu deit,” Narcicio Pereira dehan ba Jornalista sira, Domingu (4/11) iha Aeroportu Lanud, Baucau. 

Entertantu, wainhira UNPol sira fa’an namanas hela sasan ba komunidade, derepenti Jornalista husi Timor Post hasai kamera hodi hasai foto, maibe Polisia UNPol hirak ne’e dehan labele hasai foto. 

“No take picture,” malae Polisia UNPol dehan, depois jornalista Timor Post hatan ba Polisia UNPol katak, I am Journalist, no problem take you picture”. 

Maske nune’e, Polisia hirak ne’ebe fa’an namanas sasan husi arme moru laran tenki halai hodi tama fali ba sira nia akapamentu Aeruportu Lanud. 

Tuir observasaun jornalista iha terenu, momentu ne’eba fatin Airoportu Lanud Baucau iha ema barak mak tenki prejensa iha ne’eba hodi sosa sasan ne’ebe maka Polisia UNPol fa’an. 

“Sira fa’an tanba sira atu fila ona ba sira nia rain, relasiona ho mandatu misaun UNMIT atu remata ona,” dehan komunidade sira ne’ebe mak hola sasan husi UNPol sira. 

.