Jornal Nacional Diario - Segunda-feira, 05 Novembru 2012
Maske mandatu UNMIT remata iha Timor Leste fulan Dezembru tinan 2012
tuir desizaun estadu nian, maibe tuir akordu entre Governu Timor Leste
ho Ministru Administrasaun Interna Portugal katak, Guarda Nacional
Republikana (GNR) sei nafatin iha Timor Leste hodi fo terinu ba membru
Polisia Nasional Timor Leste (PNTL).
“Akordu ne’ebe hahu iha Setembru tinan kotuk hau asina ho Ministru
Administrasaun interna husi Portugal, tanba ita hotu hanoinkatak,
UNMIT atu sai ne’e laos buat ida ke mai derepenti, buat ida ita hanoin
kleur tiha ona, tanba ida ne’e mak ita bo’ot sira lembra katak,
ikus-ikus ne’e GNR mos ajuda iha formasaun ba ita ninia polisia i tuir
estatutu PNTL ninian, nia natureza komunitariu mas ho natureza ne’e
militar, i displina militar i professional ho buat sira ne’e hotu,
tanba ne’e mak ita koko tiha ona GNR fo formasaun diak tebes, ida ne’e
mak ita sei kontinua,” esplika Primeiru Ministru no Ministru Defesa
Seguransa Kay Rala Xanana Gusmao, Tersa (30/10) iha Kuartel geral GNR
Kaikoli, Dili.
Alende ne’e, PM Xanana Gusmao mos entrega medalha solidaridade ba
Guarda Nacional Republikana (GNR) Portugal nain 42 ne’ebe mak durante
ne’e halo kna’ar iha Timor Leste, serimonia ne’e nuudar kontribuisaun
GNR ninia ba harii pas no estabilidade iha Timor Leste.
Entertantu, Komisariu UNPol Luis Carilho hateten, servisu UNPol lao
susesu, tanba iha kolaborasaun husi Polisia Nacional Timor Leste
(PNTL), ne’ebe mak lao diak hodi fo susesu ba eleisaun Prezidensial no
Parlamentar iha tinan ne’e.
Iha biban ne’e mos, Reprezetante UNMIT iha Timor Leste, Finn Reske
Nielsen fo agradese ba estadu Timor Leste, tanba bele fo ona medallha
solidaridade ba UNPOl.
.
Sem comentários:
Enviar um comentário
Nota: só um membro deste blogue pode publicar um comentário.