“FRETILIN Husu KAK Investiga MAP”

.

Jornal Nacional Diario - Tersa-feira, 06 Novembru 2012 

Bancada FRETILIN iha Uma Fukun Parlamentu Nasional (PN) husu Komisaun Anti Korupsaun (KAK) atu halo investigasaun profunda ba Ministeriu Agrikultura e Pescas (MAP), relasiona ho projeitu fila rai gratuita iha Distritu 13 ne’ebe mak to’o agora la suksesu. 

Tuir deputadu Bancada FRETILIN, Manuel de Castro Pereira hateten, asuntu fila rai gratuita husi MAP ba populasaun sira sempre kestiaona tanba dehan falta mina, maibe nunka mais hetan resposta, tanba ne’e, V Governu ne’e tenki responsabliza. 

“Hau hakarak kestiaona oituan tanba orsamentu 2012 aprova iha fulan janeiru i ninia ejekusaun ne’e iha fulan Abril, maibe fulan Agusto ne’e osan mohu tiha ona, maibe ita tun ba baze realidade laiha, no a’at liu tan sira fo rajaun katak konbustivel laiha, ne’e presiza investiga,” hateten deputadu Manuel Castro iha Plenaria segunda (05/11). 

 Manuel haklaken katak, iha loron hirak liu ba nia halo vizita ba iha suku Burkoli, Sub Distritu Venilale, Distrito Baucau, hatudu katak iha suku ne’e tinan-tinan sira fila rai maka’as tebe-tebes maibe agora sira labele fila rai tanba konbustivel hotu ona halo nia kunfuzaun. 

 “Orsamentu ba tinan 2012 nian aprova duni ba projeitu fila rai gratuita nian ga lae? karik aprova duni, osan ne’e ba iha ne’ebe?,” duvida deputadu Manuel. Ba kestaun ne’e, antes ne’e mos deputadu bancada FRETILIN, Aurelio Freitas mos kestiaona kona ba projeitu fila rai gratuita iha Distritu Lautem, Sub Distritu Lospalos tanba iha ne’eba projeitu fila rai gratuitu ne’e elementu MAP sira nian halo diskriminasaun ba komunidade sira.

 “A’at liu tan, komunidade sira husu atu fila rai sira nian, maibe sira dehan mina laiha no ida ne’ebe hakarak fila entaun tenki tau mina,” dehan Aurelio. Ba kestaun ne’e, deputadu Bancada Partido Demokratico Adriano Joao foti defeza de Honra hodi responde ba intervensaun bankada FRETILIN nian katak, PD nunka fo orientasaun ba elementu MAP nian atu fila rai gratuitu ba Agrikultor PD nian de’it. 

“Hau foti defeza de Honra katak, PD nunka fo orientasaun ba ninia membru sira ne’ebe tur iha membru governu atu bele uza orsamentu estado nian ba iha aktividade partidarias,” dehan Adriano. 

,