“Ema Indoenzia Loke Negosiu Prostituta Iha Bairru-Pite”

.

Jornal Independente - Tersa-feira, 06 Novembru 2012

Sidadaun feto Indonezia nain tolu hamutuk ho Timor oan lubuk aluga uma privadu balun iha Bairru-Pite hodi halo Negosiu Prostituta.

Tuir sasin ne’ebe lakohi temi nia naran hateten katak, durante ne’e sira haree duni sidadaun feto husi Indonezia nain tolu hamutuk ho Timor oan balun hala’o duni vida prostituta iha fatin ne’e.

Nia dehan, atividade ne’e hala’o kleur ona, maibe nunka hetan intervensaun husi autoridade lokal sira, nia rasik triste no trauma tanba fatin ne’e iha loos populasaun nia leet, tamba bele estraga joven sira iha bairo ne’e.

 “Hau so tauk deit fatin ne’e kontinua iha, entaun neneik bele estraga labarik foin sa’e sira, tanba fatin ne’e iha loos populasaun nia leet,” dehan sasin ne’e ba Jornalista INDEPENDENTE iha Bairo-Pite foin lalais ne’e.

Entertantu, tuir informasaun husi feto prostituta ne’ebe la temi nia naran hateten, sira ne’ebe durante halo vida nuudar prostituta Timor oan deit hamutuk nain 15 no Indoenzia nain tolu. Fatin ne’e laos sira nian, maibe iha nain ema mane ne’ebe sira selu husi osan ne’ebe sira hetan husi atividade ne’e.

Nia hatutan, kada langanan sira simu hetan U$ 15. Husi osan ne’e sei fahe tolu U$ 5 ba uma nain, U$ 5 ba bandidu sira ne’ebe hein fatin ne’e, maibe kada loron sira bele hetan lukru to’o U$ 100.

 Nia dehan, hili dalan ne’e tamba situasaun uma laran mak obriga sira hili dalan nune’e, tamba nia la iha ona familia ne’ebe bele ajuda nia, entaun nia tenki desidi hili dalan nakukun ne’e.

,