“Elementu F-FDTL Ameasa Povu Manufahi”

.

Jornal Nacional Diario - Tersa-feira, 06 Novembru 2012 

Reprezetante povu husi Bancada FRETILIN, Leonel Marcal informa katak, Elementu Falintil-Forca Defeza Timor Leste (F-FDTL) ne’ebe mak Governu koloka ba iha Distritu Manufahi hodi reforca serviso Policia Nasional Timor Leste (PNTL) iha parte seguransa, ameasa fali populasaun iha Distritu ne’ebe refere. 

 “Hau husu prezensa F-FDTL sira iha povu nia leet ne’e atu fo seguransa ba povu ka, ba ameasa fali povu,” sublina Deputadu Leonel Marcal husi bancada FRETILIN ba plenaria PN segunda (05/11). 

Nia informa tan katak, iha loron (29/10) foin lalais ne’e iha akontesementu ida iha Suku babulo Distritu Manufahi, elementu F-FDTL sira tu’un diretamente ba fatin akontesementu hodi atua situasuan ne’e, no laiha kordenasaun ho PNTL sira iha Distritu Manufahi. 

 “Problema ne’e kikoan ida, labarik joven sira mak baku malu, maibe membru F-FDTL sira ne’e iha relasaun familia ho ema ne’ebe mak ahlo problema ne’e, entaun sira ba halo tuir deit saida mak ema ne’ebe halo problema hateten ba sira, F-FDTL sira la halo kordenasaun uluk ho PNTL sira maibe, sira mak tun diretamente iha fatin akontesementu,” esplika nia. 

Nia haktuir tan katak, populasaun iha Distritu manufahi la kontenti ho atuasaun ida ne’e tanba, F-FDTL sira uza fali civil hodi atua situasaun ida ne’e. 

 “Kareta ne’e ema civil mak kaer hodi tula forsa F-FDTL sira iha laran, hodi mai soke ema ida ne’ebe la sala to’o nia ain tohar iha estrada ninin no baku estudante sekundariu ida to’o mi an,” haktuir nia. 

Deputadu Leonel ne’ebe reprezenta husi Distritu Manufahi ne’e afirma tan katak, elementu F-FDTL ne’ebe mak soke ema ne’e agora dadaun halo hela tratamentu ho aimoruk tradisional iha Manufahi. 

Nia esklrase, povu iha Distritu Manufahi agora dadaun senti trauma hela tanba sira hare katak, koperasaun no kordenasaunentre F-FDTL sira ho PNTL sira iha Distritu refere la diak. 

Nia aumenta katak, se situasaun hanesan ne’e beibeik, Polisia ho F-FDTL bele hasoru malu fali iha situasaun ruma tanba agora dadaun komesa hatudu dadauk ona liu husi situasaun hanesan ne’e. 

Tanba ne’e, Povu iha Distritu refere husu ba Sekretariu Estadu Dfeza (SED) katak, bainhira atu koloka F-FDTL sira ba iha Distritu, tenki fo instrusaun ida los katak, sira nia prejensa iha Distritu ne’e atu fo apoiu ba PNTL sira hodi mantein estabilidade laos atu ba hala’o fali PNTL nia serviso. 

Iha fatin hanesan, Deputada Angelina Machado husi bancada Partido Demokratico hateten mos katak, populasaun agora suspira tebes, tanba Forca F-FDTL sira ho PNTL sira halo sira tauk. 

,