Vitima Masakre Atabae Mate Hamutuk Nain Lima Ona

.

"Kosok oan, Filomeno, hetan tah iha kanuk" (TS) - Foto, Tempo Semanal

Tempo Semanal News Update, 26/10/2012  

Komandante PNTL Distritu Bobonaro Superintendenti, Joao Belo iha dada lia exkluxivu ho jornal tempo Semanal iha dadersan (26/10) Informa katak ema deskuinesidu oho komunidade nain lima iha no nain lima seluk daudaun ne’e hala’o hela tratamentu iha Ospital nasional Guidu Valadares Dili, hafoin de hetan atakes ema nain hat mate kedan iha fatin no nain neen seluk evakua ba Ospital Nasional no ohin dader mais ou menus tuku lima ho balun labarik feto ho idade tinan hitu ida ne’ebe sofre hela kanek tah nian iis kotuk iha ospital Dili. 

“Hakarak informa ba ita katak mate agora daudaun iha Atabae ne’e nain hat, ida lori ba Dili maka mate iha ospital Dili, ne’e mak hamutuk mate nain lima,” dehan Komandante Joao belo ba Jornalista Tempo Semanal. 

Super intendenti Belo dehan iha kalan bo’ot sira halo kedan evakuasaun ba kanek sira ne’e mai Ospital nasional no to’o iha Dili tuku rua madrugada. 

“Hodi kalan tuku hitu hanesan ne’e grupu deskuinesidu taka oin metin mai asalta uma kain rua ne’ebe sira konsege oho ema hamutuk nain lima depois nain lima seluk ami lori tiha ona ba ospital nasional Dili,” relata Joao Belo. 

Suspeitu sira ne’ebe ba halo tah ema nain sanolu membru husi uma kain rua iha aldeia Ailok Laran, Atabae vila ne’e konsege eskapa aan. Membru PNTL ho lalais kedan halo intervensaun ba akontecimentu tristeza refere. 

“Intervensaun hodi kalan halo husi komando unidade UPF, Komando policia distritu Maliana, Polisia Maritima no Policia special husi Nasional hamutuk ona halo intervensaun iha ne’e I situasaun kontroladu,” dale Super intendenti Joao Belo. 

 Maske nune’e komandante Joao belo rekuinese katak suspeitu seidauk bele kaptura tan ba, “halo analiza ba informasaun hotu-hotu depois maka ami sei aprezenta ba iha Tribunal.” 

Nia haktuir katak, ‘husi nain lima ne’ebe mate kedan ne’e idade entre trinta ba kuarenta nain rua I selu-seluk ne’e mesak labarik ki’ik oan hotu. Labarik ki’ik oan sira ne’e ho idade tinan tolu ba to’o tinan sanolu resin rua.” 

 “Bu’at ne’e la’os ona fragante delitu nune’e dezde hodi kalan (25/10) kedan ami halibur evidencia, relasiona ba kazu ida hodi kalan ne’e,” Joao Belo dehan. 

 Tuir informasaun ikus ne’ebe jornal ne’e simu husi komandante Distritu Maliana dehan vitima nain sanolu ne’e ema bo’ot mane ida de’it no sira seluk ne’e mesak feto ho labarik. 

Kona ba motivasaun kazu ne’e ami labele foo sai tan ba sei iha hela prosesu de investigasaun. Tuir informasaun ne’ebe jornal ne’e halibur iha Ospital nasional Guido Valadares nota katak mate nain hat mak sei iha hela Atabae sei lori hotu mai Ospital atu halo autopsia. 

Daudaun ne’e Doutor sira iha Ospital nasional sei halo tratamentu intensive ba vitima balun iha sala de emerjencia no kanek balun muda ona sala paicha fatin nian.

 Tuir testamunia iha Ospital Guido Valadares dehan atu salva kosok oan Filomeno (iha letratu ne'e) ninia inan hodi aan taka netik maibe Filomeno sei sofre mos tah iha ninia kanuruk karuk. 

Inocenti oan ne'e toba hela iha kama ospital Guido Valadares no hein husi ninia apa ne'ebe tuur muron hanesan trauma hela ba akontecimentu iha ninia uma laran. 

.