Problema Dividas Ukun Governu Anterior AMP: “PM Xanana, Sei Troka Sistema Kupon”

.

Jornal Nacional Diario - Tersa-feira, 16 Outubru 2012 

 Primeiru Ministru Bloku Koligasaun Kay Rala Xanana Gusmao, rekoinese katak durante ne’e governu gasta kombustivel maka’as liu, tanba ne’e, nuudar xefe do Governu, PM Xanana Gusmao, sei buka meus atu troka tiha sistema kupon ne’ebe mak durante ne’e Governu utiliza hodi hetan kombustivel.

 “Mina los duni governu gasta maka’as, tanba ne’e agora buka atu kuriji sistema kupon nian, nune’e labele gasta mina maka’as iha futuru,” PM xanana Gusmao haktuir lia hirak ne’e iha nia intervensaun, durante diskusaun orsamentu Retifikativu iha Parlamentu Nasional, Sesta (12/10). PM Xanana Gusmao esplika katak, iha tinan ida ne’e, nu’udar Xefe do Governu PM Xanana Gusmao sei kontrola liu tan manutensaun veiklo, nune’e evita despezas ba governu, hanesan erru ne’ebe mak akontese tiha ona iha pasadu. 

Relasiona ho despezas Xefi do Governu ne’e promete katak, iha tinan 2013, V Governu konstitusional sei buka esforsu masimu, hodi bele estabiliza tiha problema despeza. Realidade ne’ebe mak iha, sistema kupon ne’ebe mak durante ne’e governu utiliza l aefikasia, tanba kupon ne’ebe mak distribui sein kontrolu, nune’e servidor estadu utiliza konformi nia hakarak. 

Alternativu lolos ne’e, governu fo ona kareta ba membru governu sira hanesan, Nivel diretores to’o funsionariu la presiza fo tan kupon, atu nune’e ema ne’ebe simu patrimoniu estadu nian utiliza ho responsablidade. 

Atu fasilita kombustivel ba servidor estadu hirak ne’e, dalan seluk maka aumenta subsidiu iha salariu kada fulan, nune’e kada servidor estadu ida-idak bele kuidadu patrimoniu estadu hanesan ninian rasik.

 Maibe bainhira governu fo tiha kareta no motorizada depois fo tan kupon hodi ense mina, dala ruma mos mosu erru barak hanesan kupon bele fa’an tiha, bele mos utiliza ba interese pesoal no seluk tan, e nia konsekuensia despezas kontinua as nafatin. Ba kestaun ne’e, Deputadu Aurelio Freitas Ribeiro, husi bancada FRETILIN husu atu PM xanana Gusmao, labele rekoinese de’it erru ne’ebe mak durante ne’e membru Governu ho servidor estadu sira halo, maibe tenki lori ba dalan justica ba sira ne’ebe mak komete erru.

 “Orsamentu retifikativu ne’e bainhira aprova tiha husi Parlamentu Nasional iha tempu besik, ami husu atu Primeiru Ministru xanana Gusmao tau matan nafatin intermo ezekusaun, atu nune’e labele iha tan mal jestaun iha governu nia laran,” Aurelio Freitas Ribeiro husu.

.