Prezidente Repúblika fó posse ba Ministru Defeza no Seguransa

.

Presidência da República de Timor Leste - Facebook

 FOR IMMEDIATE RELEASE

Prezidente Repúblika fó posse ba Ministru Defeza no Seguransa Dili, Timor - Leste, 22 Outubru 2012: Prezidente Repúblika Taur Matan Ruak, Segunda-feira ne’e fó posse ba atual Primeiru Ministru, Kay Rala Xanana Gusmão ba Ministru Defeza no Seguransa iha Palasiu Prezidênsial Nicolau Lobato Dili, hodi enxe kargu Ministru Defeza no Seguransa ne’ebé durante ne’e mamuk.

Iha nia intervensaun hafoin fó tiha posse, Prezidente Repúblika dezafia emposadu, Sekretariu Estadu Defeza no Seguransa inklui Komandu PNTL no F-FDTL atu hala’o k’nar diak liu tan hodi hasoru dezafius sira ne’ebé mak sei mai liu-liu iha area seguransa no defeza wanhira mandatu UNMIT remata no husik Timor-Leste.

Xefe Estadu subliña ; “Iha ita nia nasaun komesa fó ona sinais aktividades prostituisaun, moras kontaminoza hanesan SIDA, ne’ebé loron ba loron numeru aumenta ba be-beik, ho problema sira ne’e hotu ita tenki fo atensaun maksimu ho konsiensia no responsabilidade hodi konstrui nasaun doben ne’e ho moralidade hodi ha’ses an hosi hahalok proibidu”.

Xefe Estadu mos preokupa tebes ho problema ne’ebé mak hato’o husi Komandante PNTL distritu Aileu katak kareta estadu balu serkula hodi halo aktividades proebidu hirak ne’e, ho akontesimentu sira ne’e hotu Prezidente Taur Matan Ruak bolu atensaun ba area Defeza no Seguransa atu bele kuidadu Timor-Leste no labele fo fatin atu sai fali kampu krimi organizadu.

“Hanesan Prezidente Repúblika akomapaña situasaun ne’e sai preokupasaun boot, ne’eduni Primeiru Ministru nudar mós Ministru Defesa no Seguransa konta ho hau nia apoiu para reforsa ita nia atividades hodi kombate buat sira ne’ebé mak akontese tamba ita nian farkeza ”, dehan Xefe Estadu.

Xefe Estadu reforsa liu tan komunidade internasional akompaña hela servisu governu no estadu nian, tamba ne’e husu ba orgaun estadu sira atu bele esforsu liu tan hodi bele hatudu ba komunidade internasional katak Timor-Leste nu’udar nasaun soberania ida ne’ebé iha k’bit no kondisoens atu lao ba oin. iha biban ne’e Prezidente mós husu ba komandu PNTL no F-FDTL atu kria atividades ba membrus iha instituisaun rua ne’e hodi nune’e membrus sira bele kreativu liu tan no labele pasivu.

Xefe Estadu Taur Matan Ruak mos bolu atensaun ba Sekretariu Estadu Seguransa atu kria kondisoens infrastrutura ne’ebé di’ak liu-liu ba postu UPF iha fronteira,tamba Prezidente konsidera tinan sanolu ona maibe kondisaun infra-estrtura UPF grave tebes.

Hola parte iha serimonia tomada de pose ne’e, Vice Primeiru Ministru Fernando Lasama de Araujo, Prezidente Parlamentu Nasional Vicente Guterres, eis Prezidente Repúblika Dr.José Ramos Horta, membrus governu balu, Komisariu PNTL, Major Jeneral F-FDTL, korpus diplomatiku no konvidadus importante sira seluk.

 Atu hetan informasaun liu tan Kontatu: Roberto de Sousa ( OIC) Palacio Presidenti, Aitarak laran Dili, Timor Leste Telemovel : +670 7800 1011 E-mail : assessorict@presidencia.tl 

.