Kestaun Legalidade PN La Tau Osan Ba Primeira Dama; “Xanana: Governu Absten”

.

Jornal Nacional Diario - Tersa-feira, 16 Outubru 2012 

Iha diskusaun orsamentu retifikativu (OR) kuaze reprejetante povu iha uma fukun Parlamentu Nasional (PN) mai ho consensus ida atu tau osan ba gabinete Primeira Dama Prezidenti da Republika Isabel Ferreira, hodi ajuda governu iha politika hamenus kiak no dezenvolvimentu. 

 Vontade hirak ne’e labele realiza tanba kestaun legalidade la fo biban atu iha Orsamentu Retifikativu (OR) governu aloka orsamentu espesifiku ida iha gabinete primeira dama, basa lei organiku Prezidenti da Republika no 3/2007, sei kesi metin hela, tanba ne’e iha futuru Parlamentu Nasional presiza toma atensaun atu halo alterasaun, nune’e iha orsamentu jeral do estadu 2013 bele fo fatin ona atu preve osan iha gabinete primeira dama nian. Ba kestaun ne’e, Deputadu husi Bancada FRETILIN esplika katak,“Ita hotu hanoin dignifika primeira dama, maibe tenki haree ba lei ne’ebe mak fiksa estrutura gabinete Prezidenti da Republika, tanba ne’e osan kontinua tau nafatin maibe la’os direitu ba gabinete primeira dama nia, mais transfer osan ne’ebe mak aloka ba gabinete primeira dama, ba fali gabinete casa civil, nune’e mak primeira dama bele hetan osan husi casa sivil, basa lei mak difini nune’e,” Afirma Deputadu Bancada FRETILIN Antonino Bianco argumenta iha nia intervensaun bainhira hala’o diskusaun OR iha Parlamentu Nasional, segunda (15/10). 

 Hatan ba afirmasaun husi bancada FRETILIN nia ne’e, Primeiru Ministru Kay Rala Xanana Gusmao dehan, iha asuntu ne’e, pozisaun governu nian absten, tanba koalia kona ba lei ne’e, kabe ba kompetensia Parlamentu nasional nian. 

 “Governu nia pozisaun absten, lei ne’e PN mak halo,” haktuir PM Xanana Gusmao. Maske iha opiniaun pro kontra maibe tanba vontade atu ajuda aktividade primeira dama nian maka’as, entaun orsamentu retifikativu ba primeira Dama ne’ebe transfere hikas ba gabinete casa Civil hetan aprovasaun ho consensus husi membru Parlamentu Nasional sira. 

.