Joven Kuluhun Harahun Uma: “Uma 4 Hetan Estragus Inklui Kios Ida”

.

Notisia Husi TVTL - Segunda-Kalan, 15 Outubru 2012 

Juventude balun iha Suku Kuluhun estraga uma hat (4) inklui Kios ida hetan estragus iha suku kuluhun, nune’e, familia vitima sira husu ba grupu Joventude nu’udar autor atu responsabliza ba estragus ne’ebe mak iha. 

 Sabadu foin lalais, uma hat hetan estragus inklui kios ida iha suku kuluhun husi grupu joventude balun iha suku Kuluhun laran. Liu husi observasaun ne’e, Jornalista TVTL haree, uma hat ne’e hetan estragus hanesan Janela rahun, odamatan at no sasan uma laran hotu, nune’e mos kios ida hetan estragus, Armari, Vidru ne’ebe tau sasan rahun hotu, unklui sasan sira seluk iha kios laran. 

Vitima sira informa ba ekipa TVTL katak, sira hader hela iha mate uma derepenti hetan provokasaun husi joven ida husi Bairo kuluhun laran, maibe komunidade sira iha fatin ne’e, la halo reasaun no hikus mai Joven ne’e bolu nia kolega sira mai asaltu no tuda rahun uma no sasan iha uma laran. 

 “Ami lahatene buat ida, tuku 12 sira mai halo rahun ami nia uma no foti hotu ami nia osan U$ 300, husu boot nain ulun sira iha leten atu tau matan ba problema ne’e, ami husu maun boot Marito Mota atu hare problema ne’e tamba nia mos iha oin” dehan uma nain. 

Iha fatin hanesan Joventude sira ne’ebe sai hanesan vitima hateten, lideransa tenki netral hodi rejolve problemas, labele lidera fali joventude grupu balun hodi ba asaltu komunidade sira iha suku laran. 

“Hau hare ralidade, hau hare ho matan, dadersan ne’e Senor Marito Mota kaer kilat manu, nia uluk mak nia haruka nia labarik sira tuda husi kotuk mai hodi estraga iha uma hirak ne’e, hau rasik haree no ema barak iha ne’e haree ho matan hotu, lei Timor la premiti para ema sivil kaer kilat iha Timor ne’e, hau husu responsablidade husi iramaun Marito Motta,” dehan Joventude parte vitima. 

 Hatan ba problema ida ne’e, Marito Mota rejeita informasaun ne’e, tamba nia ba atu hakalma situasaun, Marito mota mos rejeita informasaun ne’ebe hateten, nia lori kilat manu hodi ameasa. 

“Hau tuir serimonia ida iha Audian, hau to’o mai labarik sira fo informasaun sira ho motor no samurai mai iha ne’e, atu ta’a kois hau nia oan mane, enatun iha altura ne’e hau sae ba atu hakalma, maibe sira hatak ami ho fatuk, enatun pasensia labarik sira mos tuda malu, hau iha oin duni, hau kaer ai no fatuk ida, senor ida mos sai mai hakilar dehan hau mak estraga nia uma ne’e la loos, iha kalan ne’e hau sae tuir ba no lir fila labarik sira, maibe antes ne’e problema mosu tiha ona no hau la hatene, hau mak hakalma, hau kaer duni ai ida laos kialta manu,” dehan Marito Mota. 

Oras ne’e dadaun Marito Mota ho nia grupo hetan ona camada husi polisia hodi presta deklarasaun. 

Tuir informasaun husi parte rua ne’e, esforsu maka’as hodi buka solusaun ba problema sira ne’e hodi rejolve ho diak. 

.