Hegemonia Emilia Pires + Alfredo Pires liu husi Projectos : G7 + Taci Mane

.

JORNAL NACIONAL DIARIO - 31 Outubro 2012 - Opiniaun Husi : Vicente Maubocy

Sira nain rua matenek uza oportunidade (oportunistas) no matenek chupa ema seluk nia kolen no kosar ben (parazitas).Tur hela deit iha fatin ka office ho AC, la kole ba kampanha, teki-teki hetan sorti tun husi lalehan, tabele ba Maun Bot Xanana sai Ministra Finansas no Ministro Petroleo ho “ lei do menor esforço “ Mafia Melbourne matenek monta sira nia estrutura no ema oin sa domina iha politica V governo nian ba sira nia interesses em vista. 

Nune posisaun estrategico hanesan Finansas atu halo gestaun ossan, Petroleo ho Gas hatama ossan, Presidensia Conselho Ministros nebe elabora no discute agenda iha alto nivil atu foti decisoens, totalmente kontrolado husi Mafia Melbourne. Mafia Melbourne Club conhece Maun Bot nia frakezas, nune facilmente sira atinge sira nia objectives desejados. Factos no evidensias maka koalia sira nia manobras no manipulasoens. 

Mai ita hare Mafia Melbourne Club sira nia rastos de pasagem (ain fatin) 

Emilia Pires nudar Ministra das Finanças (MF) iha tinan 2010 to´o ohin loron tenta apropria grupos g7+ nudar projetu pesoal ba ninia performence no hatudu ba laran no ba liur. Iha rai laran tenta konvence PM Kay Rala Xanana Gusmao. Oinsa mak buka hetan confianza husi Maun bot no tenta impoen interese Emilia Pires no ninia kroni Melbourne Club iha Governo. Liuliu buka manipula no domina setores estratejiku iha economía estadu nian hanesan, finanças, petroleo liu husi jestaun ba fundu petróleo. 

Tentativas konvese Komunidade Iinternacional, liu husi Instituisaun Financeira Banku Mundial.Estrategia atu hetan konfiansa, maka uza bandeira kombate pobreza liu husi instituisaun G7 atu nune, iha ikus bele hetan netik fatin ruma nudar Manejer ba Banku Mundial, tanba Emilia Pires mos hakarak banati tuir Sri Mulyani,ex Ministra das Finaças Indonesia ne´ebe oras ne´e kaer kargu nudar Manager iha Banku Mundial. 

 Emilia Pires konsegue tanba nia fan naran Timor-Leste nian, liu husi g7+, ikus mai Banki Moon Sekretariu Jeral ONU nian bolu nia ba tama Painel ba personalidades mundial hodi hare konaba kontinuasaun husi MDG´s. 

Agio Pereira, apropria nudar porta voz Governu, hodi hasai komunikadu ne´ebe louva Emilia Pires. Enquanto membros Governu seluk mak la pertense ba sira nia grupo, maske sira nia achievment diak iha governasaun, la iha atensaun husi komunikadu ruma husi porta voz Governu. Pior liu tan, manipulasaun husi decisaun Konseilu Ministru, decisaun oin ida, redasaun final haruka ba Prezidente Repúblika promulga no divulga iha Jornal da Republika oin seluk.

Exemplo barak mak hanesan Estadu fó arendamentu ba ENSUL hodi explora espasu Fisiku SAPT ho durasaun 99 anos, ne´ebe ex- Ministra Justiça,husu atu ajenda fali ba debate maibe Agio Pereira la autoriza.Nomeasaun provisoriu ba Presidente Conselho Administrasaun RTTL,EP ho durasaun mandatu to´o Governu foun, signifika ke iha V Governu, tenki iha ona ka nomeia ona Presidente Conselho de Administrasaun foun, maibe realidade texto iha Jornal da Repúblika hakerek kata,”Mandato Sr. Espedito ho durasaun mandato quatro anos (Hare Jornal Republica)”. 

Manipulasoens Emilia Pires 

Out puts husi Emilia Pires ninia ambisaun mak: nia hasai tiha knar no porfolio ne´ebe mak tuir lolos Ministerio dos Negocios Estranjeiur mak halao, maibe ba fali Emilia Pires nudar MOF mak halao fali servisu MNE nian. Ne´ebe ninia papel mak exekuta política externa ne´ebe programa no asaun halao tuir interese nasional Etadu no banati tuir Constituição RDTL. 

Iha situasaun ne´e normal, se iha tinan hira ba kotuk MNE Zacarias Albano da Costa, konfrontu ho Emilia Pires no Melborn Club ne´ebe ninia maestro ka big boss Agio Pereira, hodi joga Zacarias no envolve katuas Xanana konfronta direta ho Zacarias tanba interesse Melborn Club nian. 

Até Emilia Pires, ba loby ho Instituisaun Formasaun ba IT iha India hodi haruka estudantes Timor oan ba estuda maibe instituisaun ne´ebe propria estuda la iha rekonecimentu. Grave liu tan, Emilia Pires haruka nia DG Coorperativa mak asina, ne´ebe viola regras protokolares estadu nian, wainhira asina akordu husi Estadu ba Estadu, enquantu iha Ministra no Vice Ministro ba Finanças. 

Kompensasi ba favor ne´ebe mak DG Santina Cardoso halo ba Emilia Pires, fó netik kargu Vice Ministra das Finanças ba nia hodi inpoen ba katuas Xanana. Ho V Governu Konstitusional, José Luis Guterres nudar MNEC, la iha poder, tanba laos ona ba halao politika externa maibe ba atende deit convites no ajendas ne´ebe komunidade internasional decide tuir sira nia interesse no estratejia. 

Enquanto Emilia Pires hadau profolio ne´ebe mak halao lolos politika externa Timor-Leste nian mak fan modelu, resolve problema ita nian ba mundu, modelu desenvolvimentu liu husi g7+. Ba rai laran, Emilia Pires, Agio Pereira no Melbourne Club sira, buka tabele tuir maun bot Xanana ka fan mak maun Xanana nia naran hodi atinji ba sira nia objetivu no interesse ekonomika. Buat kiik bot maun Xanana, toó momentu importante sira mak deside. Exemplo: foin dadaun formasaun ba V Governu, Melbourne Club la hola parte iha esforsu ba kampanye eleitoral. Estrutura Partidu CNRT, servisu mate an, to´o iksu nem estrutura partidu CNRT rasik mak hola decisaun, maibe Melbourne Club ka Agio Pereira, Emilia Pires no grupos mak decide hotu. 

 Dionisio Babo,nudar Sekretariu Jeral Partidu, maibe Sekretariu Jeral partid lolos mak Agio Pereira no adjunto mak Emilia Pires. Lista ne´ebe mak to´o iha Maun bot Xanana nia liman mak lista ne´ebe elabora husi Agio Pereira, Emilia Pires no Melbourne Club. Enquanto listas ne´ebe maka Estrutura executivu Partidu CNRT elabora nem ida to´o iha maun Xanana nia liman, natural ke sira buka isola maun Xanana ba estrutura partidu CNRT, KP Partido CNRT, grupos suporter maun Xanana. V governu ne´e hatudu momos katak Mafia Melbournee Club mak konsolida sira nia poder politika, tanba okupa kargus bo-bot hanesan: Agio Pereira, Ministro Estado do Presidente do Conselho de Ministro (MEPCM), Emilia Pires,Ministra Finanças (MoF), reforsas nia poder hodi simu tan servisu balun husi antigo MED ne´ebe lidera husi ex-Ministro Joao Gonçalves, Alfredo Pires, husi Secretariu Estadu sae ba Ministro, aumenta tan posisaun forte no decisivu hodi determina ba projetu bo-bot, hanesan Projetu Tasi Mane, GSR,no sst. 

Husi Mafia Melbourne Club, buka monta sira nia emar iha fat-fatin, elementus chaves ba ekonomia sira mak kaer ka tau sira nia ema, hanesan: Jestaun ba Fundu Mina Rai iha Ministerio das Finanças, ANP, Timor Gap, Lda, FCDH, CNA,etc. Grupos Mafia Melborne Club mos buka hatama tan US$200 M iha OJE2013 (hare iha artigu tuir mai) ho bandeira diversifika investimentu Fundu Petroleun maibe halo mos operasaun iha Off shore iha Bolsa ka Bursa efek iha Merkadu internasional.

Emilia Pires no ninia Mafia Melborne Club mos oinsa monta sira nia ema ka ajentes iha Ministerios hotu-hotu, liliu gabinete PM nian, estratejia oinsa mak pasa sira nia mensajen ba PM iha momentu ne´ebe certu.Emilia Pires, Alfredo Pires no Agio Pereira, molok ba hasoru PM hodi inpoen sira nia hanoin no projetu ruma, buka uluk dere ba Elizabet Esposto hodi husu,” Se PM está bem disposto ou não”. Se Elizabet Esposto hatan katak “O PM está bem disposto”, hafoin sira ható sira nia hanoin ba PM Kay Rala Xanana Gusmao, exemplo konkretu mak oinsa mak projetu konstrusaun ba Porto Hera, no sel-seluk tan. Emilia Pires, Alfredo Pires no Agio Pereira ho grupoMafia Melborne Club sira, iha tratamentu espesial, momentu hanesan Orçamento Estado, foin dadaun Orçamento Ratificativo (OR) membros Governos sira labele sai ba liur, maibe Melbourne Club iha V Governo ba goza ferias iha liur, Emilia Pires nudar Ministra das Finanças, envez hela iha laran hodi ba defende orçamento ba tiha liur. 

Agio Pereira OR seidauk hotu ba liur ona, Alfredo Pires no grupos Melbourne Club ba passa ferias iha Nusa Dua Bali, enquantu membros Governu seluk tuba iha Parlamento hodi simu lia menon no kritika husi membros Parlamentos sira. 

Emilia Pires konsegue inpoen ninia hakarak no ambisaun liu husi apropria tiha g7+ hodi promove pessoalmente ba hetan kargu iha nstituisaun financeira internasional. Aproveita fiar husi PM Kay Rala Xanana Gusmao, ho rekursus ne´ebe mak iha, financeira no ekipa teknika ne´ebe hodi halao atividades g7+ nian.

 Helder Costa, intelektual ne´ebe hasai PhsD ka Doktor, nudar mestre cerimonia no servisu atu promove imajen Emilia Pires hodi manan prestigio no naran, hodi promove pessoalmente iha instituisaun financerias internasionais,liliu ba okupa kargu ruma iha Banco Mundial. Evidensias promosaun, iha dia 1 Outubro 2012 iha Programa Four Corners ABC Australia Emilia Pires leno nia oin koalia kona Taxas husi reseitas Bayu Udan nian nebe Conoco Philips sei dauk selu $ 3 billion. 

Hau sente disparate bot. Tan sa maka foin hak-fodak? Tinan 5 nia laran Emilia Pires ho Alfredo Pires nia team la preokupa? Ekipa Tax husi Ministerio Finansas no Accounting ANP nian monitor semanalmente mensalmente anualmente kuantidade produsaun ka lae? Mais ironiko ami husu data produsaun ba ANP, halo rekonsialiasaun ho reseitas la koresponde.Depois ami husu ba Asutralia dehan ANP maka hatene. (Confusaun bot). 

Ikus mai Senhora ida husi Resource Department husi Australia mai hasoru Emilia Pires, husu kuantidade produsaun, Emilia dehan “la hatene” (disparate bot).Devia dehan “kuantidade exata depois maka hau haruka halo tiha konsulta ho devisaun relevante” signifika katak Emilia Pires “kakutak mamuk”. 

 Alfredo ba Suai ho helicopter UN nian ho reporter ABC koalia propaganda mega projecto Taci Mane. Ikus mai ba Hera hatudo Power Plant hodi dehan katak pipeline Gas Bayu Udan maka fornece gas. Rediculo liu, Alfredo pomove Power Plant Hera hanesan Projecto iha nia portfolio nia okos. 

Tuir regra devia konvida Januario Sec Estado Eletricidade acompanha, tamba projecto Eletricidade pertense Januario nia Departmentu. Hau husu ba Januario nia dehan “mano hau lahatene” Hau dehan ba Januario “ imi kuidado ho mafia Melbourne club se lae halo ita hotu henesan ayam potong”. 

Hanesan tos “ ita maka hamos, kuda,silo, tau iha uma, tei tasak tiha, Mafia Melbourne club mai hadau, sira maka han ho kontenti” ita han aning hodi hetan kabun bubu, moras no mate saugati”. Hau la hatene Alfredo lori gas husi Beasu mai Hera tula iha saida? Pipe ka ,ho ro ka, ho kareta?

 Husi aspetu ida ne, conceito sei dauk klaro. Oin sa bele hetan sucesso? Hau duvida barak capacidade Alfredo nian lori avante projecto Taci Mane hodi hetan sucesso.Artigo tuir mai hau descreve ho pormenores, insucesso Projecto Taci Mane atu leitores sira aprecia no avalia. “Pratika maka hatudo kriterio lia los” actos liu husi hanoin, sekunda ho komportamentos komprova katak Mafia Melbourne oras ne iha V governo domina setores estrategicos hanesan Finansans, Petroleo, Presidencia Conselho Ministros, nebe halo agenda ba asuntos importantes nasaun nian, iha hotu Mafia Melbourne nia okos. 

Hau hare membros V governo nian barak matenek mai be la brani hasoru grupo Mafia Melbourne Club. 

Oin sa kombate manipulasoens Mafia Melbourne Club? 

Responsabilidade Parlamentares, politicos, academicos, emprezarios ho sociedade sivil hotu-hotu hamutuk ho neon, lian no asaun, ita iha forsa atu hatun sira. 

Nota do blogue: A tradução para o Português deste artigo de opinião de Vicente Maubocy será publicada na próxima segunda-feira.
.