Funsionariu SAMES Ameasa Halo Greve; “Sei Hapara Distribuisaun Aimoruk”

.

Jornal Nacional Diario - Kuarta-feira, 17 Outubru 2012 

.

Funsionariu Servisus no Ekipamentus Saude (SAMES) husu ba Ministeriu Saude atu buka lalais solusaun ba sira nia situasaun, se la’e, sira sei hapara hotu distribuisaun aimoruk ba hospital nasional no distritais hotu iha Timor laran tomak. 

 Porta Voz asaun greve SAMES, Armindo Martins hateten, SAMES sei hapara distribuisaun Aimoruk ba iha Hospital Nasional inklui Hospital Referal sira iha Distritu 13, wainhira MS la buka solusaun adekuadu ba problema ne’ebe sira infrenta tinan barak iha SAMES. 

“Ami sei hapara distribuisaun Aimoruk ba HNGV no Hospital referral iha distritu 13, kuandu Ministru saude la buka solusaun ba problema ne’ebe ami infrenta,” afirma Armindo Martins ba Jornalista sira iha fatin asaun greve, SAMES Kampo Alor, Dili, Tersa (16/10). 

Nia hatutan katak, mosu greve ne’e tamba nia problema hun ne’e buat ida de’it kontratu iha ne’eba hateten, klaru katak, tabela salarial pagina 32 no mos osan bah an no mina hamutuk U$ 72 maibe seidauk tau iha pratika. 

 “Laos ohin ami halo ezijensia ne’e, aban atu selu ona ami lae, maibe tenki fo nia rejultadu ne’e por eskrita katak, ami nia ezijensia ne’e tau iha agenda lori ba Konsellu Ministru atu debate no hato’o ninia rejultadu mai ami,” esplika Armindo Martins. 

Nia hatutan, ezijensia SAMES ne’e halai liu ba mosu kontratu ne’e, tamba atu prepara ba kapitalizasaun tuir Planu Estratejia Dezenvolvimentu Nasional (PEDN) iha ne’ebe, Primeiru Ministru tun dehan, iha posiblidade iha tinan 2015 SAMES sai empreza publiku EP.

 “Ami hasoru tiha ona Ministru Saude Sergio Lobo no dehan niasei hasoru ho Konsellu Administrasaun SAMES hodi rezolve ami nia problema ne’e, ami hein mak la rejolve, tamba ne’e ami tenki hola dalan regirozu hodi hapara distribuisaun aimoruk ba Hospital hotu iha teritoriu Timor tomak,” deklara Porta Voz ne’e. 

Hatan ba kestaun ne’e, Ministru Saude Sergio Lobo hatete, kona ba problema ne’e iha hela prosesu laran atu rezolve tamba ne’e nia hateten katak, ital abele uza fali ida atu impede fali servisu saude iha Timor laran tomak. 

 Nia mos hatutan tan katak, kona ba subsidiu no osan mina no osan han nia nebe tau hela iha kontratu laran ne’e sei tau iha agenda para debate iha Konsellu Ministru.

,