“Funsionariu Fo Aluga Kareta Estadu Ba Povu”

.

Jornal Timor Post - Tersa-feira, 16 Outubru 2012 

Oknum Funsionariu Publiku (FP) uza kareta estadu ho numeru matrikula 02-819G fo aluga ba povu sira husi Manatuto Vila ba Sub-Distritu Soibada. 

Iha 13 Outubru foin lalais ne’e, iha Distritu Manatutu tuku 22:00 Otl, populasaun kuaze nain 5, nain 2 Timor oan no nain 3 seluk sidadaun Filipina ne’ebe mak hola feto hela iha Soibada maka aluga kareta ne’e. Lasazeirus nain 5 ne’e dezloka husi kapital Dili, depois to’o iha Manatutu husu kareta ne’e hodi aluga ba Sub-Distritu Soibada. 

 “Ami buka kareta kijang atu aluga, maibe maun ne’e (FP-red) maka hatan katak, kareta iha maibe ho presu U$60 no ense mina 20 litrus, tanba ne’e, ami mos hakarak,” Pasajeirus ida dehan ba ekipa media Gabinete Prezidenti Republika iha Fatuk Makerek, Distritu Manatutu, Sabadu (13/10). 

 Tanb ho kondisaun lanu, kondutor ne’e la konsege tula pasajeirus to’o fatin kontratu nian, maibe hatun hela deit pasajeirus nain 5 iha Fatuk Makerek. 

 “Nia mai hatun hela de’it ami iha ne’e (Fatuk Makerek) tanba nia lanu, osan ne’ebe ami hodi aluga ne’e nia la fo fila balun, maske la to’o fatin objetivu,” pasajeirus informa. 

 Nune’e, pasajeirus hirak ne’e, ekipa media husi prezidenti da Republika maka ajuda hela hodi tula to’o soibada iha momentu kalan boot. 

Depois ne’e, iha Domingu (14/10), ekipa Media Prezidenti da Republika hetan kundutor ne’ebe mak fo aluga kareta ba pasajeirus iha pertamina Kaimaleloki, Hera. 

Nune’e, ekipa media foti kedas fotografia kareta estadu ho numeru matrikula 02-918G, iha biban ne’e, kundutor hapara kareta hodi husu ba ekipa media Prezidensial katak,”imi maka hodi kalan tula ema sira aluga kareta ne’e ga? 

Sira mak obriga hau hodi tula hela sira ba Soibada,” kundutor ne’e defende an. 

.