Fernando La Sama Deskobre; “Mosu KKN Tanba Ita Sei Kiak Hela”

.

Jornal Nacional Diario - Kuarta-feira, 17 Outubru 2012 

Vice Primeiru Ministru ba Asuntu Sosiais, Fernando La Sama de Araujo, deskobre katak, Korupsaun Koluzaun no Nepotismu (KKN) mosu iha rai laran tanba Timor oan barak mak sei kiak hela. 

“Ita Timor Leste hau buka atu hatene kompara oituan husi rai seluk ninian, Timor hau dehan dala ruma ema dehan Korupsaun Kolusaun no Neporismu mosu tanba ita sei kiak hela,” esplika Vice Primeiru Ministru Fernando La Sama, tersa (16/10) iha salaun Ministeriu Negosiu Estranjeiru, praia dos Coqueiros, Dili. 

Ho fenomena hirak ne’e, Vice Primeiru Ministru La Sama, husu ba Timor oan hotu ne’ebe assume kargu Estadu nian labele halo KKN, tanba KKN sei hafraku Estadu ne’ebe Timor oan hotu hahi ne’e. 

 Eis Prezidenti Parlamentu Nasional segundu lejislatura ne’e sublina katak, iha Timor Leste ne’e tenki so’e tiha hahalok a’at ne’ebe ema ida mak tur iha pozisaun boot iha instituisaun ida, entaun nia familia mak servisu hotu deit iha instituisaun ne’e.

 “Hanesan Vice Primeiru Ministru ho Primeiru Ministru koalia barak iha Konsellu Ministru, dala barak, ami koalia iha ne’eba nune’e, Primeiru Ministru nia ezijensia mai ami membru Governu maka tenki haree ba produktividade servisu,” haklaken La Sama. Iha okaziaun ne’e, Vice Primeiru Ministru La Sama, apela ba FP sira tomak atu kontrola ida-idak ninia an no mos oinsa hasa’e produtividade servisu nian ho lolos. 

.