Entrega Ruin Konis Santana; “Lu-Olo: Tenki Liu Husi FRETILIN”

.

Jornal Nacional Diario - Tersa-feira, 16 Outubru 2012 

Prezidenti partidu FRETILIN, Francisco Guterres ‘Lu-Olo’ rekomenda ba familia Saudozu Nino Konis Santana atu reuni harii komisaun ida para antes entrega ruin Saudozo Nino Konis Santana ba Estadu tenki liu uluk husi Partidu FRETILIN.

 Restus Mortais Nino Konis Santana nina, tuir planu Governu nian sei halo’ot ho dignidade iha iha Jardim dos Herois, Metinaro, Dili, tinan 2013. Lia hirak ne’e hato’o husi Prezidenti Partidu FRETILIN, Francisco Guterres Lu-Olo ba Jornalista segunda (15/10) iha Uma Fukun Parlamentu Nasional, wainhira partisipa debate Orsamentu Retifikativu iha espesialidade. 

 “Ami FRETILIN propoin tenki iha komisaun ida ne’ebe tama hamutuk iha prosesu komesa hasai saudozo nia ruin husi Mertutu, Ermera to’o iha Tutuala, Lospalos no entrega fali ba iha governu FRETILIN tenki tama iha laran, ami hatete, familia laos intrega direkta ba iha governu, maibe intrega ba FRETILIN mak prosesa ba Estadu,” dehan Lu-Olo. 

Nia hatutan katak, FRETILIN tama iha klaran tanba saudozu lider masimu FRETILIN ninian ne’ebe mate iha ai-laran no mo slider masimu iha tempu rezistensia ninian, tan ne’e FRETILIN iha obrigasaun atu bele tama iha prosesu ne’e nia laran.

 “Ami husu atu reuni fila fali, maibe familia saudozo ninian seidauk fila, sira sei konsulta opiniaun ba seluk tan no sei reuni fila fali ho ami, atu nune’e bele haree ba prosesu ne’ebe mak iha atu kria komisaun hodi bele servisu hamutuk,” esplika Lu-Olo. 

Lu-Olo husu ba estadu no governu atu hare prosesu lori ruin saudozu ninian, komesa husi Mertuto, Ermera to’o iha Tutuala, Lospalos no mos tau iha Jardin Heroi ho diak.

.