“Bancada FRETILIN Dezafia ADN Servisu Ho Rigorozo”

.

Jornal Independente - Segunda, 01 Outubru 2012 

 Bancada FRETILIN iha Parlamentu Nasional (PN) dezafia Ajensia Dezenvolvimentu Nasional (ADN) atu servisu ho rigrozu bainhira halo kontrola ba kompania sira ne’ebe kaer projeitu estadu. 

Deputadu Inacio Moreira hateten, FRETILIN husu atu ADN servisu ho rigorozu, tanba projeitu emerjensia barak konsultador sira tau osan boot liu no la tuir kustu lolos ne’e bazeia ba projeitu ne’ebe hala’o. 

Nia dehan, projeitu emerjensia ba reabilitasaun estrada Dili kompania aprezenta kustu too tokon U$40, maibe prjeitu ne’e rasik to’o oin loron seidauk remata no la hatene se mak atu responsabliza. 

“Hau hakarak hatete konsultador sira ne’e tau osan ezajeradu, tanba la tuir BOQ,” dehan nia iha PN. Inacio mos duvida ho ADN ne’ebe foti desizaun ba projeitu ne’ebe mak la ho rigrozu hodi hamosu deskonfia. 

Nia mos duvida ho servisu ADN ne’ebe halo inspeksaun ba projetu sira molok halo pagamentu tanba iha projeitu barak maka inagura ona maibe seidauk uja tanba seidauk kompleta halo 100%. 

Deputadu husi bancada FRETILIN ne’e mos kritika, sistema aprovizionamentu governu nian ne’ebe deside fo projeitu ba komapnai sira, tanba kompania ida bele kaer projeitu iha fati-fatin, hanesan hodi viola regra aprovizionamentu, ikus mai kompania ne’e rasik laiha kualidade no kapasidade atu jere projeitu sira ne’e. 

 “Iha kompania ida rua ne’e projeitu iha fati-fatin nia mesak mak kaer, hau bele temi kompania BTK, Wijaya, ne’e tamba saida,” dehan Inacio. 

Ba kestaun ne’e, Diario ne’e koko atu konfirma ho diretor ADN Samuel Marcal, maibe labele konfirma tanba diretur ADN oras ne’e dadaun halo hela vizita servisu ba rai liur.

,