“Timor Leste Sei Failla Iha MDG”

.

Jornal Timor Post - Kinta-feira, 27 Setembru 2012 

 Primeiru Ministru (PM), Kay Rala Xanana Gusmao Rekoinese, Timor Leste sei faille atu atinji objetivu Dezenvolvimentu Milenium (Millennium Development Goals/MDG, tanba numeru kiak iha rai laran sei iha. 

Kestaun ne’e Xanana koalia, Kuarta (26/9), iha abertura konferensia New Deal ne’ebe hala’o iha Nova Yorke, akompania husi Ministru Negosiu Estranjeiru no koperasaun, Jose Luis Guterres no Ministra Financas, Emilia Pires.

 Hanesan fo sai iha ajensia Lusa, xanana hateten, dezafiu boot ba Timor Leste ba oras ne’e mak sei kontinua kombate kiak, maibe nia optimista katak, Timor Leste sei atinji duni objetivu ne’e iha tinan 2030.

 “Ami partilla ho ema iha ita ninia laneta ne’e hamutuk milloens 1.000, to’o tinan 2015 tiha mos Timor Leste sei lakumpri objetivu husi dezenvolvimentu mileniu, maski nune’e iha ona vizaun, objetivu no planu ida atu transforma Timor Leste hanesan nasaun ida ne’ebe ho rendimentu mediu-elevadu to’o iha tinan 2030,” sublinha Xanana. 

Xanana dehan, atu atinji meta ne’e Timor Leste sei hala’o liu husi investimentu kapital social no umanu, meloramente kualidade no asesu ba saude, Edukasaun, Formasaun professional, Justisa no area balun seluk tan.

 “Ami hetan oportunidade istotika ida hodi tenta muda buat hotu, ami bele mos aprende lisaun husi dezenvolvimentu milenium hodi halo analiza ba saida mak funsiona no ida ne’ebe seidauk funsiona,” hateten Xanana. Entertantu, durante partisipasaun iha debate Asembleia Geral, Gusmao mos sei hala’o inkontru bilateral ho Prezidenti Liberia, Ellen Jhonson-Sirleaf no ho Sekretariu Jeral ONU, Ban Ki-Moon, ne’ebe mai vizita ona Timor Leste iha fulan Agusto Liu ba. 

Konferensia ho tema “The New Deal” ne’ebe organiza husi Prezidenti Republika Liberia, Her Ny Ellen Jhonson-Sirleaf ne’e atu bele hateten, esperensia membru Painel inklui Prezidenti Republika Indonesia, Susilo Bambang Yudhoyono, Primeiru Ministru Australia, Julia Gillard, Primeiru Ministru Haiti, Laurent Salvador Lamothe, Primeiru Ministru Ilha Salomon, Gordon Darcy Lilo, Ministru Negoriu Estrangeirus Afganistaun, Zalmai Rassoul, no Ministru Dezenvolvimentu no Kooperasaun Denmark, Christian Friis Bach. Ministru G7+ sira seluk ne’ebe partisipa iha serimonia ne’e iha mos oportunidade halo intevensaun, ho reprejentasaun superior iha serimonia ne’e hodi hamosu nivel lukru ne’ebe a’as iha Niva Yorke nuudar momentu importante atu hasa’e visibildade G7+ no New Deal. 

.