“Projeitu BTK Iha Batugade Laiha Kualidade”

.

Jornal Timor Post - Sesta-feira, 28 Setembru 2012 

 “Kompania BTK ne’ebe kaer Postu imigrasaun Batugade Laiha Kualidade, falta kndisaun barak, maibe prosesu pagamentu 100% ona, agora sei kaer tan projetu iha Portu Hera,” kestiaona Deputadu Husi Bankada FRETILIN, Inacio Moreira iha Uma Fukun Parlamentu Nasional. 

 Ba kestaun ne’e, Inacio husu ba Governu, liuliu Ministeriu Obras Publiku (MOP) no Ajensia Dezenvolvimentu Nasional (ADN) tenke identifika kompania nasional no internasional ne’ebe hala’o serviso laiha kualidade atu labele fo tan projeitu. 

 “Realidade ne’e akontese ba kompania BTK ne’ebe kaer Postu imigrasaun Batugade laiha kualidade,” hateten deputadu FRETILIN, Inacio Moreira foin lalais ne’e iha PN. Inacio hatutan, MOP, ADN inklui mos aprovizionamentu tenke servisu ho laran moos, katak, kompania ne’ebe la iha kualidade ka kompania ne’ebe hetan projeitu barbarak maibe halo kna’ar laloos tenki apara projeitu. Relasiona ho kestaun ne’e, Deputadu husi bancada CNRT Manuel Guterres sujere atu Ministra Financas hadia sistema aprovizionamentu no ADN tenke hatudu profesionalizmu servisu para hetan konfiansa husi povu.

 “Klaru projeitu barak ne’ebe iha IV Governu nia tempu laiha kualidade, maibe pagamentu finaliza 100% ona, ida ne’e halo ami duvidas ba sira nia kapasidade, tan ne’e, ba futuru husu atu hadia failansu hirak ne’e,” afirma Manuel.

.