Prezidenti TR Claudio Ximenes: "Membru Governu Seidauk Deklara Riku Soin Ba TR"

.

Jornal Nacional Diario - Kuarta-feira, 12 Setembru 2012

Prezidenti Tribunal Rekursu (TR), Claudio Ximenes deklara, to'o ohin loron laiha membrus do Governu ida maka deklara ninia riku soin ba Tribunal Rekursu.

"To'o agora Sr. Prezidenti da Republika maka entrega tiha ona, hau hanoin ema seluk, nein ida seidauk hato'o tan deklarasaun kona ba rendimentu ne'e," informa Prezidenti Tribunal Rekursu (TR), Claudio Ximenes ba Jornalista sira Tersa (11/9) iha Palacio Prezidenti Bairo-Pite, Dili, hafoin sorumutu ho Prezidenti Republika Taur Matan Ruak.

Maske nune'e, Claudio Ximenes hateten katak, sei iha tempu ba membru Governu sira atu deklara sira ninia riku soin ne'e ba orgaun refere.

Tuir lei ne'ebe iha katak, membru Governu sira ne'e iha tempo loron 60 hafoin tomada de posse hodi deklara riku soin ba Tribunal Rekursu, maibe Governu foun ne'e foin funsional loron 34, tan ne'e sei iha tempo loron 26 atu deklara riku soin ba Tribunal Rekursu.

"Governu foin tama iha funsaun semana hirak ba kotuk ne'ebe sei iha tempu para sira atu aprezenta deklarasaun ida, ami seidauk fo hatene tanba tempu ba sira atu aprezenta ne'e seidauk liu," haktuir Claudio Ximenes.

Prezidenti Tribunal Rekursu ne'e hatutan tan katak, Tribunal Rekursu sei fo hatene ba membrus do governu sira para deklara sira ninia riku soin tuir lei ne'ebe maka preve tiha ona iha Konstituisaun.

Nune'e Claudio Ximenes mos dehan katak, atu labele duvida husi povu no sosiedade sivil kona ba transparansia no kombate korupsaun iha futuru, dalan diak liu mak membru governu sira tenki hatama deklarasaun riku soin ba Tribunal rekursu.

"Tenki fo hatene ba Governu para atu haruka deklarasaun n'e mai," dehan Claudio Ximenes.

.