“Odete Prontu Hatan Kazu Maternidade”

.

Jornal Timor Post Kuarta-Feira, 19 Setembru 2012

Diretor Jeral Hospital Nasional Guido Valadares (HNGV) Odete Viegas hateten, pronto atu hatan iha kualker tempo kona ba kazu bebe monu husi kama sala maternidade HNG.

“Ami mos pronto atu hatan, kuandu familia hanoin katak, kazu ne’e ba sira, afende tebe-tebes,” responde Odete ba Timor Post iha HNGV, Tersa (18/9). Maske nune’e Odete rekoinese sala, maibe sira mos pronto atu fo hanoin kazu ne’ebe mak foin lalais akontese iha maternidade HNGV.

Diretora ne’e esplika, kazu bebe ne’ebe mate tanba monu ba sementi leten mak mate, maibe lolos antes ne’e bebe mate kedas ona iha inan nia isin.

Nia realsa, Hospital seidauk iha intensaun aat atu estraga pasiente ne’ebe ba halo tratamentu, akontesementu ne’e hanesan lisaun ida atu oinsa profesionais saude sir abele iha atensaun ba servisu atendementu enjeral.

Relasiona ho kazu ne’e, Tersa (18/9) diretora halo kedas inkontru extra-ordinario ho supervisor, xefi departementu maternidade hodi fo orientasaun ba staf sira atu serviso ho profesionalidade tuir juramentu. “Ami rekoinese duni, ami nia sala, maibe em prinsipiu familia sira mos tenki hatene, katak, prosesu ida bebe moris ne’e no kondisaun bebe nia ne’e bebe mate kedas ona,” Odete dehan.

 Realidade ne’ebe akontese ne’e, iha domingu (16/9) halo parteira balun senti tauk atu fo imformasaun bainhira Timor Post atu halo konfirmasaun. “Ne’e ami la hatene, bele ba husu iha oin,” dehan parteira sira iha sala maternidade, segunda (17/9) bainhira Timor Post koko husu kona ba pasiente ne’ebe nia oan mate.

Tuir fontes balun ne’ebe lakohi hateten ninia naran, ba Timor Post haktuir katak, dala ruma pasiente sira hakilar hela iha fatin, maibe parteira sira halo finji no la fo atensaun masimu ba inan isin rua sira.

Ba kestaun ne’e, Guido Sarmentu nudar tiu husi pasiente hateten, iha kuartu laran pasiente akompanha husi nia kaben Floriano Ernestu Gomes, komu nia mesak no nia feen mos la tahan, dulas an tun sae iha kama laran, halo bebe ne’e sai husi nia inan nia kabun laran monu tun ba rai (sementi leten) rezultadu bebe feto ida ne’e nia hussar kotu rasik deit, hafoin ne’e, fo hatene doutor no parteira sira halai nadodon tama ba kuartu laran, mas la konsege salva bebe nia vida.

“Ami familia vitima hakilar no koalia maibe sira la fo atensaun ba inan isin rua no sira dada lia deit iha liur, tuir lolos parteira sira hein ba inan isin rua 24 oras hodi hein simu bebe oan husi nia inan nia kabun laran, maibe bebe ne’e hili fali iha kama okos ne’e tamba sa,” dehan nia.

Ba akontesementu ne’e, parte familia vitima telefone kedas ba pareta Polisia Servisu Investigasaun Kriminal (SIK) mai foti kedas medidas sukat fatin akontesemetnu hanesan dadus ida atu kontinua halo prosesu investigasaun.

Entertantu, depois bebe ne’e hetan susar, iha biban ne’e, familia vitima sira evakua kedas mate isin ba vitima nia hela fatin Bidau, no segunda (17/9) familia sira halot kedas mate isin iha uma oin, nune’e mos inan husi matebian kontinua baixa iha HNGV hodi halo tratamentu.

.