"MSS Distribui Fos Aat Ba UNPAZ"

.

Jornal Timor Post - Tersa-feira, 11 Setembru 2012

Fos tonelada ida ho balun (1,5 ton) ne'ebe Universidade da Paz (UNPAZ) hetan apoiu husi Ministeriu solidaridade Sosial (MSS) labele uza tanba fos aat.

"Ami halo proposta hodi husu ajuda fos husi MSS, fo apoiu fos tonelada ida ho balun mai UNPAZ, afinal ami labele uza fos ne'e ba han, tanba fos ne'e aat hotu," dehan reitor UNPAZ, Prof. Doutor Lucas da Costa ba Timor Post iha nia servisu fatin, Kampus Prinsipal Hosindu I, Manleuana, Segunda (10/9).

UNPAZ husu apoi ba MSS ne'e atu suporta Universitarius estejiadus de serviso ka Kulia Kerja Nyata (KKN) iha komunidade nia let ba tinan akademika ne'e ho estudante hamutuk 761.

Lucas dehan, tanba fos ne'e aat entaun UNPAZ la distribui ba estudante sira, maibe iha momentu ne'eba Universidade koko fo kaut ida ka rua ba estudante sira, mas depois estudante sira koko an mos la diak duni.

"Fos ne'e lori mai ami konsege distribui ba estudante hamutuk nain 761 ne'ebe mak koloka ba iha Sub Distritu tolu hanesan, Distritu Liquisa, Zumalai no atauro, maibe fos hitak neé estudante sira la konsege aan, tanba fos ne'e aat," dehan Lucas.

Iha sorin seluk, Xefi estudante husi lokasi KK Suku Beloi, Longuinhos Maia ba Timor Post, via telefone, segunda (10/9) katak, fos ne'ebe mak UNPAZ simu husi MSS ne'e fos 50 Kg ne'ebe mai husi nasaun Vietnam, maibe fos hirak ne'e aat hotu.

"Ami nia lokasi simu fos saku rua, maibe fos ne'e foin fase kaer ba buti rahun hotu hanesan, ahu no sai kinur los depois iis forte, neébe ami la han," dehan Maia.

Fos ne'e, tuir Maia, sira simu iha loron Domingu dia 26 Agustu, wainhira Estudante Universitariu koloka estajiariue ba iha sub Distritu Atauro.

"Fos ne'e ami la konsege han no ami fahe tiha ba ketua Joven Suku Beloi nian hodi sira fo han sira nia fahi no manu.

.