LH-Yayasan Hak Akuza: “Governu Uza Osan Estadu La Onestu”

.

Jornal Nacional Diario - Tersa-feira, 04 Setembru 2012

Organizasaun Nao Govermental (ONG) Yayasan HAK no Luta Hamutuk (LH) akuza Governu uza osan estadu nian la ho onestu no prudenti, maibe nakonu ho Korupsaun Koluzaun no Nepotismu (KKN), tanba ne'e wainhira uza osan ba sosa kilat ba seguransa, laos sosa kilat ne'ebe iha kualidade, maibe pelo kontrariu kilat uza la to'o loron ida at ona.

"Governu Timor Leste uza orsamentu Jeral Estadu (OJE) la ho prudente, la ho bujaksana (laran diak) no la ho onestu, maibe nakonu ho KKN, tamba ne'e mak rejultadu ne'ebe mak mai la fo benefisiu ne'ebe diak," dehan Mericio Akara.

Nune'e mos nia dehan laos kilat deit maka kualidade la diak, maibe ba projeitu sira ne'ebe durante ne'e Governu intrega ba Kompania sira moa nia rejultadu la diak e estraga deit povu nia osan.

"Ne'e laos kilat deit, maibe projeitu bara-barak mos laiha kualidade," dehan Mericio foin lalais ne'e.

Nia mos haktuir tan, ita haree hanesan akontese dadaun ba kilat ho marka PM2 V1 ne'ebe mak sosa ba Corpu seguransa Pesoal (CSP) ne'ebe mak foin lalais koko tiru deit aat ona.

Ho ida ne'e Mericio Akara hateten katak, wainhira atu sosa kilat presiza cek uluk lai kilat ninia kondisaun ka kualidade para labele hamosu inprnsaun ida katak, gasta osan povu nia atu ba sosa kilat diak, maibe afinal ba sosa fali kilat falsu ka uzadu nian.

Diretor ONG Luta Hamutuk ne'e mos suejere ba PN atu bolu Sekretariu Estadu Seguransa no komandante jeral Polisia Nasional Timor Leste (PNTL) Longuinhos Monteiro atu halo esklaresementu, tanba sa mak uza osan povu nia ba sosa fali kilat ne'ebe laiha kualidade.

Ba kestaun ne'e, husi sorin seluk, Directur ezekutivu Yayasan HAK Rogerio Viegas Vicente hateten katak, Governu laiha planu no jestaun diak ba sosa kilat.

"Kilat ne'ebe ita nia governu sosa foin mak koko deit aat tiha ona, ida ne'e hatudu katak ita laiha preparasaun jestaun, nune'e mos loloos labele hanoin deit mak ba sosa kilat iha Indonezia mai, maibe depois sosa tiha kilat sai fali hanesan esperensia iha tinan 2006, hatudu an sosa kilat maibe no fim kilat sira hanesan krizi 2006 lakon no ninia paradeiru ne'ebe ita la hatene tuir," Rogerio Vicente kestiaona.

Rogerio mos dezafia Governu, atu halo estudus ida kona ba vantazen no dezvantazen TL tenki sosa kilat husi Indonezia atu la bele afeta iha futuru mai.

.