Kazu Tuana Laran: "Tuir Informasaun Boby Halai Sai Husi TL"

.

Jornal Timor Post - Kuarta-feira, 12 Setembru 2012

Komunidade suku Vilaverde, Aldeia Lemorai, Tuana-laran, kontinua eziji parte justica atu prosesa kazu Tuana-Laran ho seriu no justu.

"Ami to'o agora mos kontinua eziji nafatin ba instituisaun F-FDTL no PNTL atu labele halimar ho kazu ne'e, maibe tenki seriu, atu nune'e membru labele uza nia poder halo arbiru ba povu," Xefe Aldeia Joao Tilman hato'o lia ne'e ba Timor Post, Tersa (11/9) iha ninia hela fatin, Aldeia Lemorai.

Joao dehan, nia rasik la satisfas ho atetude membrus husi forsa nain haat ne'ebe halo ona agresaun fiziku ba vitima Maximiliano iha tersa (04/09) kalan iha Bar May Flower, Tuana-Laran.

Turi nia, forsa loloos iha etika moral para halo aprosimasaun ho ema seluk neébe foun ba nia, sa tan lori naran instituisaun no Major Jeneral Lere Anan Timor nian hodi hatauk komunidade.

"Ida ne'e erru boot ida ne'ebe instituisaun presiza toma konsiderasaun," nia dehan.

Nune'e mos, Joao husu ba Polisia Nasional Timor Leste atu akompania prosesu ne'e, tanba medidas hotu kona ba kazu ne'e Polisia mos hetan ona dadus sa tan iha envolvimentu ne'e inklui mos sivil nain rua ho Boby (estranjeiru Indonesia) no ida seluk husi TL, tanba ne'e, instituisaun PNTL mos tenki tau konsiderasaun ba aktus violensia ne'e.

Ba kestaun ne'e, tuir informasaun ne'ebe mak diariu ne'e asesu, akontesementu ne'e suspeitu Boby halai sai ona husi TL fila ba Indoensia, ne'e duni, informasaun ne'e mak loos, entaun, komunidade husu ba polisia atu servisu hamutuk ho estadu Indonesia atu desporta suspeitu fila mai TL para tuir Prosesu Justisa.

.