Kazu Tuana-Laran: "Lere Husu Vitima Lori Ba Tribunal"

.

Jornal Nacional Diario - Kinta-feira, 13 Setembru 2012

Xefe Estado Maior Jeneral FALINTIL-Forsas Defesa Timor Leste (F-FDTL) Maijor Jeneral, Lere Anan Timur husu vitima ne'ebe hetan agresaun fiziku husi elementu F-FDTL iha Tuana-laran, Dili foin lalais ne'e atu lori kazu ne'ebe ba tribunal hodi prosesa tuir dalan justisa.

"Asuntu krime nian hau husu ba vitima sira lori kazu ne'e ba Tribunal diak liu, porque ita nia alin sira ne'ebe que vitima ba agresaun fizika porpatimu sira nian ne'e todan lori ba Hospital, lori ba Primeiru Ministru, hanoin ida ne'e labele para de'it iha ne'e," deklara Maijor jeneral Lere Anan Timor ba Jornalista sira kuarta (12/9) iha Palaciu Prezidenti Bairo-Pite, Dili, hafoin sorumutu ho Prezidenti da Republika (PR), Taur Matan Ruak hodi hato'o situasaun seguransa rai laran ba Presidente.

Hatan kona ba nia (Lere) nia oan (Boby) mos hola parte halo agresaun fiziku iha kazu refere no tuir in formasaun Boby halai tiha ona husi Timor, Lere hatan katak, Boby La halai ba rai liur.

"Boby ne'e Timor oan ne'e uluk tanba funu ne'e mak ema lori ba Indoenzia," haktuir jeneral Lere.

Kazu Tuana-Laran nebe involve F-FDTL ne'e, vitima hato'o keixa ba Primeiru Ministru tan ne'e iha tersa liu ba, Primeiru Ministru xanana Gusmao hato'o despaico ba nia (Lere) konaba keixa ne'e.

Ba kazu ne'e rasik instituisaun F-FDTL liu husi seksaun de Justisa oras ne'e dadaun estuda, analiza inklui sei halo hela investigasaun ba kazu refere.

"Hau simu antes ami nia membrus ninia deklarasaun i investigasaun ne'ebe mak Polisia Militar halao iha neeba que hau kontaktu dokumentu rua ne'e, i hau kanaliza ba ba ami nia seksaun de justisa sei estadu, sei analiza, sei halo investigasaun," dehan Lere Anan Timor.

.