Governu Halaó Projeitu La Iha Koinesementu ba Komunidade: "Populasaun Quelecai Keixa Ba PR Taur Matan Ruak"

.

Jornal Timor Post - Tersa-feira, 11 Setembru 2012

Komunidade Aldeia Laumana, Suku Letemumu, Sub Distritu Quelecai, Distritu Baucau, hato'o keixa ba Prezidenti da Republika, Taur Matan Ruak ba projetu ne'ebe halaó iha sira nia uma fatin no to'os laran sein iha koinesementu.

"Ami mai hato'o keisa ba Prezidenti Republika tanba kompania no Governu lokal halo tiha projetu PDD irigasaun nian iha ami nia uma fatin no to'os laran sen fo konesementu ho ami," informa Rai nain Maria Madalena dos santos Fatima (10/9) ba Jornalista sira iha Palasiu Prezidenti, Bairo-Pite, Dili.

Kestaun ne'e sira hato'o ba Prezidenti Republika tamba, depois rai nain hirak ne'e trava hodi labele kontinua lai projetu irigasaun, maibe Kompania lori Polisia Nasional Timor Leste (PNTL) esquadra Quelecai hodi halo ameasa fali komunidade ho lia fuan, se mak hakarak trava dezenvolvimentu hasoru Polisia.

"Ho razaun ida ne'e ami komunidade senti ameasadu, tanba ami nia propriedade maibe laiha diretu koalia, tanba ne'e ami mai hasoru prezidenti da Republika,"Maria dehan.

Nia dehan, tuir kumprimisiu Xefe Estadu Taur, iha momentu kampania katak, sidadaun ida iha diretu atu hela iha rai pedasku ida no kuandu governu atu halo projetu ruma tenke halo aproximasaun ho rai nain, tamba ne'e mak komunidade sira mai hasoru hodi afirma ba sira nia diretu nain ba rai.

Ho problema hirak ne'e, komunidade husu ba Xefe Estadu para tau matan ba diretu no propriedade komunidade nian tuir kumprimisiu iha kampania foin lalais.

Projeitu irigasaun ne'e harii iha rai ne'ebe mak pertense ba luta nain kombatente no veteranus ne'ebe mak mate no terus iha funu laran.

"Ami senti triste tebes tanba, ami nia inan no aman sira mate hotu ba rai ida ne'e, maibe ami nia uma fatin no to'os estadu foti hodi halo projetu, sem konesementu," Maria hateten.

Aliende ne'e, antes ne'e mos, rai nain fo hatene ona ba autoridade lokal husi Suku letemumu, maske nune'e, autoridade lokal laiha inisiativa diak para buka solusaun liu husi mediasaun.

Entertantu iha fatin hanesan, rai nain Sebastiaó Wairia grava hela liafuan ne'ebe mak komando Eskuadra Quelecai koalia hasoru nia.

"Liafuan ne'ebe komandante Polisia ameasa, hau sei grava hela, momentu ne'eba autoridade lokal bolu hau atu koalia, Polisia tama ameasa hau," Wairia dehan.

.