Estatistika MF: "La Refleta Kondisaun Moris Povu"

.

Jornal Independente - Sesta-feira, 14 Setembru 2012

Estatistiku Ministeriu Finansas (MF) iha tinan 2012 katak kresimentu ekonomia iha Timor Leste oras ne'e dadaun sa'e to'o pursentu 14, hamosu deferensia idea katak, la refleta realidade kondisaun ekonomia povu.

Kinta horsehik (13/9) iha diskusaun planu Governu ba tinan lima, mosu preokupasaun no kritika makaas husi deputadu sira liuliu Bancada FRETILIN kona ba realidade ekonomia ne'ebe povu infrenta kompara ho orsamentu ne'ebe Governu gasta.

Deputado Osorio Florindo husi bancada FRETILIN hatete, nia parte senti konfuzaun ho dadus ne'e, tanba rendimentu ekonomia to'o pursentu sanulu resin haat (14%) uniku iha azia maibe rendimentu baisu mos kiik liu iha azia mak Timor Leste rasik.

"Sasukat saida mak governu iha atu komprova katak kresimentu ne'e sa'e ba pursentu 14, enkuantu povu barak hakilar dehan, folin sasan aumenta, dezenpregu aumenta," kestiaona Osorio Iha PN horsehik.

Tuir dadus husi total populasaun ne'ebe mak iha pursentu 55 mak konsidera kiak, ne'e tuir osorio la refleta ho dadus Governu estabelese ho gastus liu US$5 Billions.

"Entertantu, se los mak goza kresimentu ekonomiku 14 pursentu ne'e, povu ka membru Governu, ka deputadu sira ou emprezariu sira," kestiaona deputadu FRETILIN ne'e.

Entertantu Primeiru Ministru xanana Gusmao hatete, kresimentu ekonomia ne'ebe mak iha, bazeia ba ekonomia rai laran, liu-liu prosesu konstrusaun ne'ebe estadu ne'e iha.

Nune'e, Primeiru Ministru (PM) xanana Gusmao hatete, inportante tebes governu investe alende rekursu umanu, tenke investe maka'as mos iha area infra-estrutura bazika atu fasilita produsaun tomak ne'ebe povu iha.

.