"Estadu Prepara Proposta Misaun Foun ONU Ba KS"

.

Jornal Nacional Diario - Sesta-feira, 14 Setembru 2012

Misaun Integradu Nasoens Unidas iha Timor Leste (UNMIT) nebe atu remata iha fin Dezembru mai, Presidenti Republika Taur Matan Ruak hatete, Estadu Timor Leste tenki ajusta pozisaun hodi bele fo opiniaun ida uniku hodi bele aprejenta proposta ba konsellu Seguransa (KS) konaba misaun foun ONU nebe atu mai.

"Hau konvida mai atu husu opiniaun ba ita boot sira parpol konaba misaun foun Nasoens Unidas iha ita nia rain, Estado Timor tenki ajusta pozisaun para que ita bele fo ita nia opiniaun uniku ba iha Nasoens Unidas aserta Pozisaun ho misaun ne'ebe para que bele aprezenta proposta ou aprezenta ita nia hanoin iha Konsellu Seguransa," Xefe Estado, Taur Matan Ruak hatete lia hirak ne'e, wainhira enkontru ho lider Parpol sira ne'ebe la hetan asentu Parlamentar, Kinta (13/9), iha Palacio Prezidenti, Bairo-Pite, Dili.

Presidenti Republika Taur Matan Ruak hatete tan katak, Misaun Nasoens Unidas foun ne'e tenki ho misaun politiku.

"Inisialmente esplorida atu prepara kondisoens ba misaun foun, i misaun ne'e tenki misaun politika," hateten PR Taur.

Hafoin inkontru, prezidenti Partidu PSD, Zacarias Albano da Costa hateten, inkontru ho Xefe Estado, Taur Matan Ruak ne'e, Parpol konkorda atu misaun ONU nafatin iha TL, maibe tenki ho misaun Politika hodi haree liu ba dezenvolvimentu rai ne'e nian.

"Ohin ami hotu hakarak misaun ida que laos iha depedensia iha konsellu seguransa nian maibe misaun ida que bele kontinua nafatin haree ba dezenvolvimentu iha rai laran," haktuir Zacarias.

Lider Partidu Politiku sira ne'ebe partisipa inkontru ho Xefe Estado, Taur Matan Ruak, kompostu husi Prezidenti Partidu UDT, Gilman Santos, Presidenti PDN, Fernando Gusmao, Prezidenti PSD, Zacarias Albano, Prezidenti Partidu UNDERTIM, L-7, Prezidenti Partidu Republika (PR) Joao Saldanha, Prezidenti PTD, Alianca Araujo, Vice Prezidenti KHUNTO, Olinda Guterres, Bloku Proklamador, PST, Partidu Monarkia, no PLPA.

Entertantu, inkontru ne'ebe hanesan Prezidenti da Republika (PR), Taur Matan Ruak halao mos ho lideransa Partido FRETILIN no mos sosiedade sivil sira hodi rona sira ninia opiniaun kona ba misaun Nasoens Unidas ne'ebe sei remata iha fim tinan ne'e.

.