TL Planu Sosa Panser: "Tenki Liu Husi Konkursu"

.

Jornal Timor Post - Sesta-feira, 14 Setembru 2012

Tuir planu, Governu sei sosa Panser (tenki/caro asalto) husi nasaun Indonesia ne'ebe produz husi PT. Pidad iha tinan 2012 ne'e nia laran atu bele aloka ba iha Polisia Nasional Timor Leste (PNTL).

Asuntu ne'e hato'o husi Diretor Jeral Kompania Pindad, Adik Avianto liu husi Jornal Media Indonezia, foin lalais ne'e.

"Agora dadauk sei iha prosesu negosiasaun nia laran no hein atu bele finaliza negosiasaun ne'ebe halo," Pindad tenik.

Panser ne'ebe kompania Pindad hatudu ona ba nasaun Timor Leste maka iha medida 4x4 ba PNTL.

Diretor Pindad sei mai Timor Leste iha Setembru tinan 2012 nia laran hamutuk ho ekipa husi kompania atu bele halo kontratu no asinatura hamutuk ho delegadus Timor-oan.

Hafoin asina akordu, sei koalia kona-ba prosesu pagamentu no pagamentu rasik sei liu husi kreditu Banku Mandiri, maibe ho montante osan ne'e rasik seidauk klaru.

Entertantu, folin Panser ho tipu 4x4, uza iha medan ne'ebe ladun perigu ka diak hanesan iha vila laran, ne'ebe ida ho folin (Rupiah RP 4 Miliar, maibe, nia folin sei sa'e, wainhira aumenta ho asesores hanesan kilat ka kamera vizilansia, nune'e mos, iha panser ba medan ne'ebe todan hanesan area rurais ho tipu 6x6, maibe ho folin PR 8 miliar.

Ba kestaun ne'e, Sekretariu Estadu Seguransa (SES) Francisco Guterres hateten, prosesu atu sosa panser ba PNTL ne'e tenki liu husi konkursu Internasional maka kompania bele hola ka supplay mai Timor Leste, aliende ne'e, nia hateten, tenki liu husi diskusaun hodi bele haree problema preriodade ne'ebe sira presiza.

"Hau dehan se deit bele mai investe iha nasaun ne'e, maibe atu supplay sasan mai iha ne'e seidauk tempu," Francisco dehan ba Jornalista sira iha Parlamentu nasional, Kinta (13/9).

.