“Amu Martinho Sisi Promesa TMR”

.

Kondisaun Eskola Pre-Sekundaria Belecasac-Suai - 26-09-2012

Jornal Timor Post - Kuarta-feira, 26 Setembru 2012 

 Diretor Komisaun Justisa no Paz Dioseze Baucau, Padre Martinho Gusmao sisi promesa Prezidenti Republika Taur Matan Ruak (TMR) sobre kualidade edukasaun. 

“Prezidenti iha inisiativa dezde sai Prezidenti Republika, agora, hau mai sisi de’it ba Prezidenti kona-ba ita boot nia hanoin kona ba sobre edukasaun, kualidade diak husi ensinu baziku,” Amu Martinho dehan ba Jornalista sira iha Palasiu Prezidenti da Republika, Tersa, (25/9), hafoin remata sorumutu ho Prezidenti Republika Taur matan Ruak. 

Tuir nia, eskola ensinu baziku, primeiru no segundu sikulu sai nuudar aliserse ba estadu hodi sai rekursu ne’ebe mak potensial iha futuru. “Se ita la preokupa ita nia ensinu baziku (Sekolah Dasar/SD) iha Timor laran, iha tinan rua nolu mai ita halua tiha nasaun Timor Leste, purke nasaun ne’e ema nia oan,” nia esplika.

.

Tanba ne’e, Amu Martinho hato’o opiniaun ba Xefe Estadu Timor Leste atu tau atensaun, tanba molok assume nuudar Prezidenti da Republika, nia mos promete no vizaun atu hadia kualidade edukasaun. 

 Padre Martinho mos hatutan tan katak, husi dezafiu hirak ne’ebe mak akontese durante ne’e, Amu Martinho fo ezemplu ida sobre lingua katak, oras ne’e dadaun estudante Universitariu hateten lingua Portugues, Ingles difisil no lian Indonezia difisil inklui tetu sei koalia sei misturadu hela. 

Nia mos hatutan, ohin loron iha Timor Leste, sekola maioria ho kondisaun siziku la diak, nune’e, fo efeitu ne’ebe la diak ba labarik sira hodi aprende no estuda. Ba preokupasaun Amo Martinho ne’e, antes ne’e, iha kampania ba eleisaun Prezidensial, Taur Matan Ruak iha perioridade sanulu (10) ne’ebe atu implementa karik sai Prezidenti Republika, entre prioridade sanulu ne’e, ida maka atu hadia kualidade edukasaun, tanba edukasaun nuudar xave ba nasaun ida nia ezistensia. 

.