“Ahi Haan Uma 9 Iha Bidau”

.

Jornal Timor Post - Kinta-feira, 06 Setembru 2012

Ahi konsege haan mutuk uma hamutuk (9) no sasan ne'ebe iha la aproveita hotu iha eis Pasar Sengol Bidau, Kuarta (5/9), maizumenus tuku haat lorokraik.

Akontesementu ne'e hahu husi restorante ida ne'ebe nia nain maka patraun Railili Jaya no liu minutu 30 ekipa Bombeiros to'o iha fatin hodi hamaten ahi ne'eba maibe nia forsa maka'as tebes.

Tuir komunidade sira iha area ne'eba, Bombeiros nia prezensa tarde tanba ne'e mak ahi sobak kedas uma sia, maibe hare husi sira nia atuasaun, konsege duni haketak ahi husi baliza no ahi haan deit uma sira neébe rabat malu.

Martina da Silva, oan husi patraun Railili Jaya, ho matan been haktuir ba Timor Post katak, akontesementu ne'e mosu tamba serviso nain ba restorante neé, aumenta tan mina rai ba fugaun ne'ebe sei manas hela, enkuantu mina rai masa rua tau hela iha fugaun sorin,maka fugaun neé derepenti nakfera, servisu nain sira halai sai husi restorante no ahi komesa han.

Maske dezastre ne'e la rejulta ema kanek todan ka mate, maibe kalkulasaun ba dezastre ne'e kuaze osan milaun ida maka lakon, tanba konta husi uma nia modelu no sasan ne'ebe sira faan, inklui hena obralan ne'ebe faan iha fatin ne'eba.

.