Xanana Gusmao: “Membrus Governu Barak Laos Atu Fahe Kadeira Ba Malu”

.

Jornal Nacional Diario - Tersa-Feira, 07 Agustu 2012

Primeiro Ministro (PM) indijitadu Kay Rala Xanana Gusmao hateten, kompozisaun iha kintu (V) Governu konstitusional ne’ebe ho membru 55 laos atu habokur malu ka fahe kadeira ba malu, maibe tuir duni ezijensia nasaun ninian.

“Tanba sa mak kria buat sira nune’e? problema ne’e membru Governu ne’e barak ka itoan ka boot ka kiik, tanba iha tinan lima ba kotuk, ami hare ami nia difisiensia, ami nia frakeza, ho ida ne’e mak ami halo buat sira ne’e para labele iha tan povu mai complain e buat ne’e konjuntural,” deklara PM xanana ba Jornalista sira, Tersa (6/8) iha Palacio Presidensial, Aitarak Laran, Dili, hodi responde ba preokupasaun FRETILIN nian kona ba loke Ministeriu barak habokur deit mak membru Governu no servisu sei la lao.

PM Xanana hatutan, iha tinan lima mai ne’e (2012-2017) buat ne’ebe mak la konsege lao iha parte dezenvolvimentu nian, bele lao diak liu tan ho kompozisaun membru governu ne’ebe mak estabelese dadauk ona ne’ebe ema dehan barak ne’e.

“Ne’e, tamba presiza duni, e ami tau ema iha neeba ami kurizi la serve, sai, hodi nune’e povu bele senti katak, Governu atu servi, governu laos mai buka estatutu ida, sai Primeiro Ministru, Sekretariu Estado, Ministro ka sai vise Ministro, mas mai ho hanoin ida katak, atu responde didiak ba povu nia moris,” dehan PM Xanana.

PM Xanana mos hateten katak, iha mandatu Governu AMP nian, nia konese problema barak ne’ebe povu tomak sei enfrenta hela, hanesan, falta bee moos, estrada, edukasaun lao la dun diak, buat sira seluk tan ne’ebe sei halo iha kintu Governu konstitusional mai ne’e.

Nia mos hatutan, iha nia servisu tinan lima ba kotuk halo servisu maka’as tebes hodi tama sai ona Ministeriu sira hotu kona ba saida mak lao iha Ministeriu laran, ne’ebe PM xanana dehan, nia koinese diak tebes Ministeriu hotu-hotu ida por ida, diretor sira hotu ida por ida.

.