Xanana Gusmao: “Ibun Boot Servisu La La’o”

.

Jornal Timor Post - Tersa-Feira, 07 Agustu 2012

Primeiru Ministru (PM) Kay Rala Xanana Gusmao presta justisa ba membru kuartu governu konstitusional ne’ebe halo servisu durante periodu tinan lima (2007-2012 nia laran.

Xanana hato’o kestaun ne’e liu husi serimonia despedida ne’ebe hala’o ho membru Governu Kuartu Governu Konstitusional iha Dili, sabadu (05/8).

Nia haktuir, durante tinan lima la’o hamutuk ho nia membru sira iha kuartu Governu konstitusional konsege koinese malu diak, balun ulun fatuk to’os no balun ulun fatuk mamar hodi halo servisu.

Ida ne’ebe ulun mamar, tuir Xanana, nunka koalia barak maibe halo servisu mak barak liu, entertantu, nia hatutan, ida ne’ebe koalia barak ka ibun boot maibe ninia servisu la la’o.

“Nu’udar xefe Governu, hau iha dever atu presta justisa ba Governu AMP,” nia dehan.

Xanana mos rekoinese katak, Governu ne’ebe nia lidera seidauk to’o mehi ida ne’ebe bele dehan sufisiente ona, tanba ne’e, nia husu ba sira ne’ebe la kontinua asumi knaar Ministru no sekretariu estadu iha Governu foun atu nafatin fo kontribuisaun ba prosesu dezenvolvimentu.

“Nuudar imi nia maun, nuudar imi nia kolega, la halua hato’o obrigadu wa’in, ba imi romak ne’ebe ida-idak fo nia kontribuisaun masimu ba prosesu dezenvolvimentu durante tinan lima nia laran,” nia hato’o agradesementu.

Sefe Governu ne’e mos akresenta, iha plaku politika sempre ‘say good bay’ ba malu, tanba nee, nia husu ba membru balun ne’ebe la kontinua iha Governu foun karik deside atu ba hela fali iha rai liur, labele haluan temi Timor-Leste nia naran.

Iha despedida ne’e, membru Governu balun ho matan ween, wainhira hakuak malu ikus nian ho Primeiru Ministru no membru Governu sira seluk.

.