"PR Taur: Tenki Uza Independensia Hanesan Instrumentu Hodi Halakon Hamlaha"

.

Notisia Husi TVTL - Kinta-Kalan, 30 Agustu 2012

Timor Leste komemora loron konsulta popular ba dala 13 iha Palasiu do Governu hodi fo omenazen ba Heroi sira ne’ebe mate ba prosesu libertasaun nasional.

Iha oportunidade ne’e, Prezidenti da Republika Taur Matan Ruak husu atu uza Independensia politika nuudar instrumentu atu hala’o hodi halakon hamlaha, luta kontra kiak no mos halakon mal nutrisaun ne’ebe kontinua estraga dezenvolvimentu labarik iha Timor Leste.

Komemroasaun loron konsulta popular ba dala 13 hala’o iha Palasiu do Governu, liu husi serimonia asa’e bandeira nasional no mos fo omenazen ba heroi libertasaun nasional.

Antes atu hasae bandeira RDTL, ba dala uluk, Prezidenti da Republika Taur Matan Ruak hala’o pasa revista ba formatura ne’ebe asiste direitamente husi Primeiru Ministru Kay Rala Xanana Gusmao, hamutuk ho membru do Governu, korpos dioplomatiku no mos Parlamentu Nasional.

Iha nia diskursu Xefe Estadu hateten, tenki uza independensia politika ho diak hodi halakon kiak, hamlaha no mal nutrisaun ba labarik sira.

"Iha ai-laran ita halo funu, ita hamutuk ho mehi ida katak, Timor oan hotu-hotu tenki moris diak, maibe ita seidauk to’o iha ne’eba, ita tenki uza independensia politika hanesan instrusmentu ida hodi halakon hamlaha, atu laiha tan mal nutrisaun ne’ebe kontinua estraga dezenvolvimentu labarik sira nian," dehan Taur Matan Ruak iha nia diskursu.

Prezidenti da Republika mos agradese ba misaun nasaun unidas iha Timor Leste durante ne’e, hodi garante paz no estabilidade ba dezenvolvimentu iha Timor Leste.

"Mandatu UNMIT la kleur tan sei remata, maibe Timor Leste presiza nafatin parseria ho nasoens unidas lao nafatin ba oin," dehan Taur.

Prezidenti da Republika mos fo omenazen ba Timor oan ne’ebe mate no lakon depois de referendum.

.