“PR Taur Matan Ruak Husu V Governu Konstitusional Aselera Dezenvolvimentu”

.

Jornal Timor Post - Segunda-Feira, 06 Agustu 2012

Prezidenti Republika, Taur Matan Ruak husu ba kintu Governu Konstitusional ne’ebe mak sei simu knaar iha loron hirak mai atu aselera dezenvolvimentu, nune’e bele hadiak povu nia moris.

“Hau husu ba Kintu Governu atu servisu maka’as aselera dezenvolvimentu hodi dignifika ita nia nasaun no muda situasaun ita nia povu nia moris husi ida agora ba diak liu tan,” Taur hateten ba Jornalista sira iha seminariu Propedeutico, Ailaok-Laran, sabadu (4/8).

Nia mos sujere ba kintu Governu konstitusional atu servisu maka’as hodi hasa’e ekonomia no fo servisu ba sidadaun Timor leste, investe maka’as iha edukasaun, agrikultura no seitor hotu ne’ebe maka hasa’e ekonomia.

Susesu atividade nasional ne’ebe maka hala’o iha Timor-Leste, tuir Taur, tanba kontribuisaun husi povu tomak no sosiedade no igreija hotu iha Timor-Leste.

.