PR Taur Deklara Riku Soin Ba Tribunal Rekursu: “Total Saldo US$147.892, Kareta 3”

.

Jornal Nacional Diario - Kinta-Feira, 23 Agustu 2012

Prezidenti Republika Taur Matan Ruak, kuarta (22/8) horseik ofisialmente deklara ninia riku soin ba Tribunal Rekursu.

Lista deklarasaun riku soin Prezidenti Republika nian ne’e aprejenta direitamente husi primeira Dama, Isabel Fereira nebe akompania husi Casa Civil Presidensial Republika nian.

Lista deklarasaun riku soin Prezidenti Republika nian nebe aprejenta ba Tribunal Rekursu ne’e total saldo US$147.892, osan sira ne’e rai iha Banku rua, Banku Central Ultramarinu no Banku Mandiri.

Total osan US$147.892 ne’e, saldo deposito familia nian, Jose Maria Vasconcelos ‘Taur Matan Ruak’ nian hamutuk ho Primeira Dama, Isabel Fereira, nune’e mos iha saldo particular, Prezidenti Republika Jose Maria Vasconcelos nian ho Primeira dama Isabel Fereira no iha mos saldo keta-ketak ba oan nain tolu nian.

Aleinde saldo ne’e, Prezidenti Republika mos iha patrimonia: Kareta Landrover (4x4) ida, Toyota Camry ida, Toyota Prado ida.

Nune’e mos iha rai privado 18.000 m2, area metiaut, no mos rai urbano iha Ossu-Una, Distritu Baguia.

Lista deklarasaun riku soin PreZidenti Republika nian nebe aprejenta husi Primeiru Dama ne’e simu direitamente husi Prezidenti tribunal de Rekursu, Claudio Ximenes.

Hafoin aprejenta lista riku soin, ba Jornalista sira Primeira dama Rimor Leste, Isabel Pereira hateten katak, tuir lei numeru 7/2007 ne’ebe husu ba instituisaun de titulares de orgaun soberania hanesan Prezidenti da Republika, Prezidenti Tribunal Rekursu, Prezidenti parlamentu Nasional no Primeiru Ministru tenki halao deklarasaun riku soin hafoin simu tomada de posse durante loron 60 nia laran tenki aprejenta riku soin.

.