“Plenaria La’o Iha Ambiente Hatun Malu”

.

Jornal Nacional Diario - Kuarta-feira, 22 Agustu 2012

Plenaria iha parlamentu Nasional, Tersa (21/8) dadersan la’o iha ambiente hatun malu ho liafuan, tanba deputadu husi Bancada CNRT Virgina Ana Belo fo sai liafuan katak, iha FRETILIN laran barak mak la halo funu karik.

Ho liafuan ida ne’e mak halo Bancada FRETILIN ran nakali hodi simu hikas ho liafuan maka’as, hodi hateten, FRETILIN la mai iha ne’e tur de’it hodi hein fulan simu osan.

Situasaun ne’e mosu bainhira sesaun plenaria orden do dia hahu, ne’ebe deputadu ida-idak hato’o povu nia aspirasaun no difikuldade ne’ebe sira infrenta iha baze liu husi fiskalizasaun.

Nune’e, deputadu husi Bancada FRETILIN Eladio Antonio Fakulto de jesus iha deklarasaun politika, kestiaona rezultadu konferensia nasional internal partidu CNRT ne’ebe mak halo transmisaun directa liu husi kanal RTTL, foin lalais ne’e.

Tanba nia konsidera husi lia fuan sira ne’ebe konfresista sira hato’o mak hamosu violensia, realidade mka joven ida mate i lia fuan hanesan bibi malae no bibi Timor la merese atu soe hodi hatun fali ida seluk.

Ho lia fuan ne’e mak deputada husi Bancada CNRT, Virgina Ana Belo ne’ebe konsidera an hasai lia fuan ne’e iha konferensia nasional partidu CNRT esplika katak, liafuan bibi malae no bibi Timor larefere ba ema ida, maibe ne’e hanesan opiniaun ida harii Governu inkluzivu no governu Unidade nasional, se karik rua ne’e lao sei laiha deferensia, izemplu hanesan bibi karik, bibi hotu, maibe iha bibi malae ida ho bibi timor ida, lia fuan ne’e la ataka ema ruma no la defama ema ruma.

“Los hau hatene hau nia an katak, hau la halo funu, tanba hau sei kiik, maibe hau nia familia mesak funu nain, Dr. Mari Alkatiri hau nia avo, ne’ebe hau hanoin katak ital abele nega no labele kehe malu, hau hanoin iha CNRT nia laran barak mak la halo, ita mos labele nega katak, iha FRETILIN laran mos keta barak mak la halo karik, diak liu ita koalia buat ne’ebe loos, ita lalika desfama no hatun malu, ida-idak serve ba nia oartidu,” deklara deputada Virginia Ana Belo iha sala Plenaria PN, tersa (21/8).

Ho linguazen ne’ebe Deputada Virginia hasai iha plenaria ne’e, sai choque ida ba deputadu sira husi Bancada FRETILIN.

Nune’e, Deputada Ilda Maria da Conceicao hamrik hodi koalia,” Imi mesak mak funu nain, ami sira tur iha ne’e laos, ne’ebe ami tur deit hein fulan simu osan,” deputada Ilda koalia ho lian nakdedar.

Ho ida ne’e, mosu ambiente diskusaun ne’ebe mak insulta malu entre deputadu sira husi bancada FRETILIN ho Deputadu sira husi bloku koligasaun.

.