.
Repúblika Demokrática Timor Leste - Presidensia Repúblika
Povu doben Timoroan sira, ohin ita selebra loron Konsulta Popular ba dala XIII. Iha loron 30 Agostu tinan 1999 povu doben Timoroan tomak ho espíritu ukun rasik-an hakat-an bá fatin votasaun sira hodi vota ba ukun rasik-an hodi desidi ita nia nasaun ninia destinu, maske iha ameasas, teror, no intimidasaun oioin, povu ne’e la lakon vontade, espíritu no aten-barani hodi ikus mai ita konsege manán fila fali ita nia INDEPENDÉNSIA ne’ebé proklama tiha ona iha loron 28 Novembru 1975.
Tinan sanolu-resin-tolu liu ona ita hamriik metin hanesan estadu no nasaun ida, iha buat barak ne’ebé ita nia estadu no governu halo ona ba ita nia sidadaun sira nia di’ak, maske seidauk alkansa buat hotu ba ita nia sidadaun sira tomak iha rai doben ida ne’e.
Nu’udár Xefi Estadu ha’u iha esperansa katak ita nia estadu no governu sei haka’as-an nafatin hodi serbii povu ho di’ak tuir liafuan hirak ne’ebé uluk ita nia funu na’in sira husik hela: “Liberta Pátria, Liberta mós Povu.”
Iha biban ida ne’e ha’u hakarak apela ba joven, estudantes no povu tomak atu buka haka’as-an hodi estuda ho badinas iha área hot-hotu atu bele reforsa ita nia rekursus umanus hodi bele harii ita nia estadu no nasaun doben ne’e.
Mai ita hamutuk fó liman ba malu ho espíritu ida atu liberta ita nia povu hosi ki’ak no injustisa nia laran. Hamutuk ita fanun malu, fó hanoin ba malu, hamriik hamutuk hodi kaer rasik kuda talin ba Timor nia futuru ida ne’ebé “Riku, Forte no Seguru.”
PARABÉNS BA ITA TOMAK
.
Sem comentários:
Enviar um comentário
Nota: só um membro deste blogue pode publicar um comentário.