“Matias Konsidera V Governu Konstitusional Adopta Sistema Oligarkia”

.

Jornal Timor Post - Kuarta-Feira, 08 Agustu 2012

Estrutura Kintu (V) Governu konstitusional iha indikasaun adopta sistema oligarkia (familia, kolegas no parentes).

“Saida mak hau haree iha kintu Governu ida ne’e, hahu mosu ou adopta sistema oligarkia, katak, amigus no parentes mak oras ne’e involve iha laran,” Dosente fakuldade Siensia Sosial Universidade Nasional Timor Lorosa’e (UNTL), Matias Guilherme ba Timor Post iha nia servisu fatin, Tersa (07/8).

Nia esplika, nia mensiona asuntu ne’e tanba iha Ministru ou Ministra kuaze besik nain 6 (neen) maka iha relasaun familia no iha mos amigus no kolegas.

Matias hatutan, deskontenti mosu husi membrus partidu CNRT rasik, relasiona ho membru kintu Governu oligarkia ne’e, tanba bloku sira rasik maka tenta hakat liu ou afera akordu ne’ebe maka sira asina ona.

“Defaktu ita iha akordu bloku, maibe Primeiru Ministru mos iha kompetensia atu fo pasta ba see de’it, buat ne’e normal iha fatin ne’ebe deit,” nia tenik.

Ko’alia kona ba poder iha futuramente, Matias haklaken, Primeiru Ministru mos sei uza ninia kbiit atu hapara membrus Governu ida enkuantu labele hala’o ninia funsaun ho diak.

.