Luta Hamutuk: “Husu PN Trava Orsamentu Retifikativu!!!!”

.

Jornal Timor Post - Sabadu, 25 Agustu 2012

Organizasaun Naun Govermental Luta Hamutuk husu ba reprejetante povu iha Parlamentu Nasional atu trava orsamentu retifikativu ne’ebe Governu planeia tanba la konresponde ba nesesidade povu.

“PN mak tenki hare uluk, tanba planu ne’e Governu nian hodi responde sira nia nesesidade, agora Parlamentu Nasional tenki independente atu hare katak orsamentu ne’ebe atu aumenta ne’e bele ezekuta iha fulan haat nia laran ka la’e, ba duni dezenvolvimentu ka lae, ba nesesidade povu nian ka lae, hanesan hadIa bee moos, eskola no estrada, se lae PN bele la konkorda ou trava orsamentu atu labele aprova, tanba nee la koresponde nesesidade povu nian no laos prioridade,” Direur Luta Hamutuk, Mericio Akara ba Timor Post, Sesta (24/08) iha edifisiu Farol.

Tuir Akara, razaun ne’ebe Ministru Financas Emilia Pires hato’o, hatudu Governu laiha planu ida ne’ebe diak, tanba orsamentu Jeral estadu 2012 ne’ebe iha, Governu foin ezekuta pursentu 40 husi total Orsamentu 1.7 biloens.

Akara hateten tan, orsamentu pursentu 60 ne’ebe Governu seidauk ezekuta bele fasilita servisu Ministru no Sekretariu Estadu, tanba sa mak tenki aumenta tan orsamentu 50 Miloens dolar Amerika ho razaun atu fasilita deit Ministru no sekretariu Estadu sira nia servisu.

“Hare husi kapasitasaun ezekusaun, governu foin ezekuta 40%, signifika orsamentu sei iha 60% hodi bele utiliza ba fulan haat, agora, kestaun maka Governasaun ida mak boot sekretariu estadu ida mak boot, entaun mai nia hanoin aumenta osan ne’e atu fasilita deit sekretariu estadu no Ministru sira ne’ebe iha,” Akara komenta.

Ne’e duni, Luta Hamutuk nia hanoin, diak liu Governu ezekuta hotu lai orsamentu restu ne’ebe iha, tamba sei sufisiente ba fulan haat no sekretariu estadu ho Ministru foun augenta lai ho prosesu osan ne’ebe iha, depois tinan oin mak sia bele hare halo retifikativu ka aumenta osan para sira hahu servisu tuir Planu Governu nian.

“Loloos ne’e la presiza, tanba orsamentu ne’ebe iha sei iha 60% para uza ba fulan haat, Setembru, outubru, Nivembro no Dezembro, tanba ne’e duni mak ami hanoin rajaun ida ministra financas hateten atu aloka hodi fasilita servisu, sekretariu estadu no ministru sira nian ne’e, ami la dun fiar katak ne’e atu la’o diak, se razaun ida mai dehan katak, aumenta osan atu hadia husi Dili to’o maliana, same, ne’e la buat ida, tanba ne’e klaru mas ida ne’e la klaru,” Akara Lamenta.

Iha parte seluk, Akara husu ba Prezidenti da Republika atu haree didiak orsamentu retifikativu ne’e no labele promulga wainhira orsamentu ne’e la koresponde ba nesesidade povu nian no fo deit benefisiu ba politiku sira ne’ebe tur iha Governu hodi goza osan povu nian.

.