Kandidatu PNTL Foun: “Francisco Guterres Ameasa Kandidatu PNTL Ne’ebe Halo Protesta Sei Halo Rekruta Foun”

.

Jornal Timor Post - Sesta-Feira, 24 Agustu 2012

Sekretariu Estadu Seguransa (SES), Francisco Guterres ameasa atu rekruta kandidatu foun Polisia Naional Timor Leste (PNTL) wainhira kandidatura ne’ebe liu ona teste kontinua halo protesta.

Nia esplika, kandidatura foun ne’ebe kontinua halo protesta ne’e hamutuk nain 271 ne’ebe mak oras ne’e seidauk tama ba formasaun iha segunda ronda atu labele halo protesta arbiru, wainhira hakarak tama ba PNTL.

“Husu ba sira atu labele protesta tun sa’e, se protesta, hau sei hasai hotu sira, hau halo fali teste foun, tanba uluk hau dehan ona ba sira katak tama polisia tenki kumpri regra ho diak,” Guterres dehan ba Jornalista sira iha PN, Kinta (23/8), relasiona ho kandidatu foun PNTL ne’ebe uluk liu ona teste halo asaun protesta ba (SES) tamba to’o ohin loron sira seidauk hetan kontaktu atu tama ba kuartel hodi tuir formasaun academia.

Guterres apela ba kandidatu sira, kuandu presiza informasaun tenki ba iha sentru formasaun PNTL Comoro atu bele hetan informasaun no labele ba fali iha Palasiu Governu.

Antes ne’e, Jonas nuudar kandidatu foun PNTL hateten, se Sekretariu Estadu Seguransa ho Instituisaun PNTL mak la rejolve sira nia problema, sira sei lori prosesu ba iha Parlamentu Nasional no sei lori ba Primeiru Ministru atu hetan solusaun.

.