“Iha Tempu Badak Prezidenti PN Sei Deklara Nia Riku Soin Ba TR”

.

Notisia Husi TVTL - Sesta-Kalan, 24 Agustu 2012

Prezidenti Parlamentu Nasional Vicente Guterres iha tempu badak sei deklara rikusoin ba Tribunal de Rekursu.

Vicente Guterres husu mos ba orgaun seluk atu halo atualizasaun no verifika kada tinan ba riku soin ne’ebe maka deklara ona iha Tribunal de Rekursu.

Hafoin Prezidenti da Republika Taur Matan Ruak deklara riku soin ba Tribunal de Rekursu, iha sesta-feira ne’e, Prezidenti parlamentu Nasional Vicente Guterres hateten, atu evita deskonfiansa publiku ba nia riku soin duranti nia mandatu, pesoalmente nia mos iha ona hanoin atu deklara asetu ne’ebe nia iha ba Tribunal de Rekursu iha tempu badak.

Nia mos husu ba orgaun komponente atu halo aktualizasaun verifikasaun kada tinan ba riku soin ne’ebe maka deklara ona.

“Aliende deklarasaun riku soin tenki iha annual atualizasaun, tinan-tinan tenki halo atualizasaun,” dehan Vicente.

Antes ne’e Xefe do Estadu liu husi nia espoza deklara riku soin ba Tribunal de Rekursu hodi sai hanesan ezemplu ba ukun nain sira seluk hodi deklara sira nia riku soin ba Tribunal de Rekursu.

.