Governu La Tau Atensaun: “Komunidade Tasitolu Uza Bee Mear”

.

Notisia Husi TVTL - Segunda-Kalan, 06 Agustu 2012

Komunidade iha Tasitolu susar atu asesu ba bee moos no komun idade ezizi atensaun husi parte kompotente ba problema ne’ebe sira hasoru.

Komunidade iha rai hun Tasitolu durante tinan hirak nia laran susar tebe-tebes atu asesu ba bee moos, tamba seidauk iha fornesementu husi parte servisu Agua no saneamentu.

Manuel Koreia komunidade hateten, nia parte halo ona proposta ba parte kompotente maibe seidauk iha resposta ne’ebe klaru husi Governu.

“Ami nia proposta ne’e ami hatama iha 15 de Agustu 2010 maibe to’o agora laiha resposta, ami durante ne’e uza bee posu hodi uza ba fase roupa no uza ba hariis maibe mear hanesan tasi been,” dehan Manuel.

Manuel Koreia mos afirma katak, oras ne’e komunidade iha area ne’eba, so bele asesu ba be posu atu uza ba fase bikan, fase roupa, no labele uza atu konsume tamba mear.

Parte kompotente promete atu fornese bee moos iha area ne’ebe, iha loron fulan maiu liu ba, maibe la konsege realiza, komunidade uma kain atus lima iha fatin refere susar atu hetan bee moos dezde tinan 2005.

.