Funsaun Publiku: “Lei Premite Membru Governu Hatama Familia”

.

Jornal Independente - Tersa-Feira, 21 Agustu 2012

Lei Funasaun Publiku fo poder masimu ba kada Ministeriu no Sekretariu Estadu sira atu lori ema hamutuk nain lima (5) husi nia partidu inklui familia rasik hodi apoiu hala’o servisu governu nian durante tinan lima.

Aliende ne’e, lei organiku Governu nian mos preve kada Ministeriu no Sekretariu Estadu presija lori ema nain lima hodi apoiu hala’o servisu governu nian.

Prezidenti Komisaun funsaun Publiku (KFP) Liborio Pereira hateten, Ministrus ne’ebe bolu deit nia familia no kolega husi nia partido rasik, ne’e la biola lei.

Tuir lei funsaun publiku hateten, kargu Xefi gabinete, diretor jeral inklui diretor nasional tenki liu husi selesaun meritu, maibe la taka dalan ba MInistru sira atu bolu nia ema ruma atu prinese deit kargu politika.

“Ida ne’e tenki lori ema konfiansa politika ka konfiansa familia, maibe ba estrutura administrative tenki liu husi selisaun meritu,” hatene Liborio ba Jornalista iha sala reuniaun Ministeriu negosiu Estranjeiru, Pantai kelapa, sesta foin lalais ne’e.

Pozisaun ne’ebe sei assume husi ema nain lima mak hanesan, ida ba xefi gabinete, ida ba diretor jeral, xefi financas, komunikasaun social (media offiecer), sekretaria no seluk tan.

Entertantu, sira nia vensimentu konsellu Ministru mak aprova, maibe kada Governu foun sempre mai ho nia lei organiku foun.

Nia informa tan, entre ema nain liam ne’e, sei laiha direitu atu sai funsionariu permanente, kuandu tinan lima remata, sira nia mandatu mos remata ona no sai hanesan ema baibain, maibe karik hakarak sai funsionariu permanente, tenki liu husi selesaun peritu ka prosesu normal husi Komisaun Funsaun Publiku nian.

Ba kestaun ne’e, informasaun ne’ebe spailha iha publiku katak, membru governu barak mak oras ne’e rekruta de’it sira nia familia no ema ne’ebe mai husi sira nia partidu politiku.

.