“FRETILIN La Responde Karta Xanana”

.

Jornal Independente - Segunda-Feira, 06 Agustu 2012

Partidu Istoriku FRETILIN lakohi responde karta ne’ebe mak dirize husi Prezidenti bloku Koligasaun Xanana Gusmao, tanba konsidera karta ne’e tarde ona.

Iha karta Xanana husu figura FRETILIN atu involve iha kintu Governu Konstitusional seim koligasaun.

Segundu Adjuntu Sekretariu Jeral Partidu FRETILIN Josefa Prereira hateten, FRETILIN konsidera karta ne’e tarde ona.

FRETILIN lakohi tanba, konvite ne’ebe fo iha loron ikus bainhira bloku koligasaun deside ona forma governu.

“Ami nia razaun mak negosiasaun ne’ebe ami halo (CNRT) laiha rejultadu, ikus mai dehan fali hatama ami ne’e, ami hanoin absorve oituan ba ami,” dehan Josefa iha PN foin lalais ne’e.

partidu istoriku ne’e mos konsidera, karta Xanana kontra desizaun ne’ebe mak CNRT hasai iha konferensia katak, lakohi halo koligasaun ho FRETILIN no hakribi FRETILIN.

Josefa dehan, FRETILIN fiar CNRT no bloku koligasaun iha ema ne’ebe iha kapasidade atu lidera governu.

Maske nune’e, Josefa dehan, Partidu istoriku ne’e sei partisipa nafatin iha diskusaun lei ruma iha Parlamentu Nasional.

Entertantu, Prezidente Partidu demokratiku Fernando La Sama de Araujo lakohi desposta kestaun ne’e, ho razaun nia laiha kompetensia atu koalia.

“Tuir hirarakia haul abele koalia, tanba hau la simu kompetensia ruma husi maun Xanana atu koalia,” dehan La Sama iha palasiu Governu foin lalais ne’e.

.