“FRETILIN Deside Sei Simu Kareta Prado PN”

.

Jornal Nacional Diario - Sesta-Feira, 31 Agustu 2012

Bancada Opozisaun FRETILIN deside ona sei simu kareta Prado neébe Parlamentu Nasional (PN) atu sosa hodi fahe ba deputadu sira ida-idak hodi halaó servisu.

Iha Segunda lejislatura liu ba, banacada Opozisaun FRETILIN lakohi simu kareta pazero neébe Parlamentu Nasional sosa hodi fahe ba deputado sira, tanba FRETILIN konsidera sosa kareta ba deputadu sira ne'e gasta de'it osan povu nian, maibe ba Parlamentu iha terseira lejislatura ne'e Bancada FRETILIN deside ona hodi simu kareta Prado ne'e.

Vice Prezidenti bancada FRETILIN, Francisco Miranda Branco esklarese katak, Bankada FRETILIN simu kareta sira ne'e tanba haree ba terseiru lejislatura ida neé fo kapasidade dezenvolvimentu liu ba Parlamentu.

"Ami desidi tiha ona ami simu, tamba maske la simu mos kareta ne'e sosa nafatin, entaun atu apoiu no tulun ami nia servisu hanesan membru Parlamentu hodi kontaktu ho ami nia eleitoradu sira, ami halo ona avaliasaun ba ami nia desizaun iha tinan lima ba kotuk, ami deside tinan ne'e ami simu, tanba FRETILIN rasik halo avaliasaun ba perioridades ne'ebe iha hodi fo kapasidade liu tan ba Parlamentu," dehan Vice Prezidenti Bancada FRETILIN, Francisco Miranda Branco ba JNDiario, kuarta (29/8) iha salan plenaria PN.

Deputadu ne'e haktuir katak, tanba Prezidenti Parlamentu hateten, nia sei esforsu atu bele koloka asesor sira iha bancada no progresu liu tan sei monta antena Radio no Televizaun ba atividade parlamentu tomak, entaun FRETILIN haree katak, iha sinal pozitivu progresu kapasidade dezenvolvimentu Parlamentu nian.

Branco mos esplika katak, iha 2007-2012 bancada FRETILIN deside la simu planu Governu tinan-tinan sosa kareta, tanba iha faktores barak, hanesan estraga deit osan povu nian no seluk tan.

Ba kestaun ne'e, Deputadu husi Bancada CNRT atual Vice Prezidenti Parlamentu Nasional Aderito Hugo afirma katak, prosesu sosa kareta iha hela prosesu tenderizasaun atu sosa kareta 65 ba deputadu III lejislatura.

.