Estanislau da Silva Aleixo: “Strutura V Governu Boot, Kontrariu Ho Komprimisiu Governu AMP Ne’ebe dehan Halo Reforma Administrativa”

.

Notisia Husi TVTL - Tersa-Kalan, 07 Agustu 2012

Total membru Governu 55 ne’ebe sei tur iha Kintu Governu Konstitusional sei la ajuda Governu hodi hala’o Administrasaun ne’ebe efisiente, tamba sekretariu estadu sira halo hikas knaar Diretur Nasionais.

Kintu (V) Governu konstitusional ho total membru do Governu 55, ne’ebe kompostu husi Ministru 17, vise Ministru 13 no sekretariu estadu 25 hetan lamentasaun husi sosiedade sivil, inklui deputadu opozisaun FRETILIN iha uma fukun Parlamentu Nasional.

Deputadu Estanislau da Silva husi Bloku opozisaun hateten, ho total mmembru do Governu 55 ne’e signifika katak, Governu ne’e boot no sei la ajuda atu hala’o Administrasaun ne’ebe efisiente no efikhasia no bele politiza aparelu administrasaun.

“Governu ne’e boot demais, 55 ne’e kontraditoriu, ne’e la tuir fali politika ne’ebe mak Governu ida AMP uluk dehan halo reforma administrative, signifika la reforma, ne’e la’o la loos, reforma ne’e la’o la hun la dikin, tamba agota tau Governasaun ida ke boot tebe-tebes, sekretariu do estadu barbarak, sekretariu estadu ne’ebe oin loron sai fali funsoens diretor sira nian, diretur nasionais ne’ebe asegura administrativu estadu ninian, hanesan ema ida ne’ebeke uluk mos kaer Governu, hau hanoin ida ne’e, invesde atu hala’o ita nia administrasaun, maibe bele kumplika tan, bele birokratiza tan, bele politiza liu tan ita nia aparelo administrative, ne’e katak aparelu administrasaun ne’e iha interogasaun barak tebetebes,” dehan Estanislau da Silva.

Iha fatin hanesan, deputadu Aderito Hugo afirma, haree ba dinamika politika dezenvolvimentu nasaun ninian, bloku koligasaun reviw estrutura ne’e maka bele hata’an ba dinamika politika ohin loron.

.