Dr. Mari Alkatiri: “Politika Maka Kria Forca, La’os Forca Mak Kria Politika”

.

Notisia Husi TVTL - Segunda-Kalan, 20 Agustu 2012

Veteranus FALINTIL husu ba estadu atu konta instoria FALINTIL loloos, tuir nia dalan, tamba iha ema balun atu manipula ona istoria FALINTIL nian.

Veteranus sira mos husu ba ukun nain sira atu fo liman ba malu hodi dezenvolve FALINTIL-FDTL ba futuru.

Loron 20 fulan Agustu tinan 2012, Timor Leste komemora loron FALINTIL ba dala 37 iha Palasiu do Governu, hafoin serimonia, Lideransa ne’ebe halo istoria, Dr. Mari Alkatiri ba jornalista sira hateten katak, iha tempu ne’eba nia rasik mak lidera ekipa ida hodi tun husi Aileu mai Dili hodi organiza forma FALINTIL.

Dr. Mari Alkatiri mos hateten katak, loron ida ohin sai nu’udar loron importante ba Timoroan sira hodi harii Forca FALINTIL iha tempu ne’eba.

“Primeira delegasaun komite Central nia mai Dili, hau mak cefia duni, delegasaun ne’e dia 20 de Agustu, 20 de Agustu maijumenus oras onje oras hau tama iha Dili, hau momentu ne’eba to’o agora mos nunka militar, maibe atu kria forces la presija militar, normalmente Politikus mak kria militar, la’os militar mak kria forcas, Politika mak kria i militar mak halo luta, luta armada,” dehan Mari Alkatiri.

Iha serimonia ne’e, Fundador FALINTIL Rogerio Tiago Lobato la partisipa iha serimonia loron FALINTIL ba dala 37 iha Palasiu do Governu, tamba nia haree katak, sei iha diskriminasaun ba fundador FALINTIL no mos ema balun komesa manipula istoria FALINTIL nian, nia hatutan katak, iha tempu neeba nia rasik mak lidera Forca Timoroan sira hodi dezarma militar Portugues iha Taibesi.

“Ema se mak dehan, nia mak tun mai Dili hodi organiza, ne’e bosok, ne’e ita bele dehan bosok, istoria ne’e tenki koalia loloos, ita koalia lia loos ne’e laos atu hadau fali fatin, istoria ne’e tenki bazeia ba faktus, buat ne’ebe akontese mak ne’e duni, be ita boot laiha iha dia prganiza depois ita boot dehan ita boot organiza, entaun ami sira momentu kaer kiat iha momentu ne’eba ne’e, ami tenki hare nia,” dehan Rogerio Lobato.

Sira ne’ebe partisipa iha serimonia ne’e informa katak, F-FDTL sei sai forca ne’ebe professional iha futuru, tamba ne’e ukun nain sira tenki fo liman ba malu hodi dezenvolve forca ida ne’e ho diak.

Komemorasaun F-FDTL ba tinan ida ne’e, hetan partisipasaun hui lideransa nasional ida ne’e nian, membrus do governu, estudantes, komunidade no F-FDTL.

.