“Dr. Mari Alkatiri Apoiu Retira Forsa ONU”

.

Jornal Timor Post - Tersa-Feira, 21 Agustu 2012

Sekretariu Jeral Partidu FRETILIN, Dr. Mari Alkatiri hateten, nia apoiu Deklarasaun Sekretariu Jeral Organizasoens Nasoens Unidas (ONU) Ban Ki-Moon katak, Timor Leste la presiza ona forsa ONU.

“Hanesan hau dehan dala hira ona, forsa hanesan tropas ita la presiza, maibe ita presiza tan mak hametin tan seguransa, hametin tan paz no estabilidade,” Mari Alkatiri hateten ba Jornalista sira hafoin partisipa iha selebrasaun Idul Fitri Iha Mesjid Annur, Kampung Alor, Dili (19/8).

Nia hateten, presiza tan atu hasai tan husi ida-idak nia ulun katak violensia ne’e dalan ida para atu halo politika, tuir nia, ita presiza nafatin para luta violensia bele sai dalan atu halo politika, poltika iha demokrasia dalan mak lei, konstituisaun no planu programa dezenvolvimentu laos uza fali violensia.

Nia haktuir, se buat hotu uza deit forsa, uza deit violensia mak rai ne’e kontinua iha violensia nia laran.

“Ita haree foin lalais iha dia 15 de Jullu buat oan id abele sunu tiha ita nia rai tomak, sorte iha lideransa (Lideransa Partidu FRETILIN) bele kontrola tiha seguransa, tamba se atu kontrola deit ho Polisia ho forsa armadas, ita la hatene nain hira tan mak mate,” dehan Alkatiri.

Nia haktuir, it abele lori polisia no forsa hodi kontrola, polisia bele lori kilat boot, lori kilat kiik, lori kilat oioin maibe la’os atu oho, tanba ohin ita oho aban iha vigansa, entaun violensia ne’e nunka mais para apara, sentidu vigansa ne’e mak sempre lori konflitu mai ita.

Tan ne’e nia hatutan, Polisia ita presiza para atu defende komunidade, forsas armadas ita presiza atu defende nasaun no povu la’os uza sira nia kilta hodi kontra povu, nia husu atu lideransa politika labele aroveita fali polisia no forsa armadas, para defende nafatin sira para atu sira kontinua tur iha kadeira, ne’e labele.

“Hanesan hau halo uluk, iha protesta hau sai laos iha prtesta ita lori polisia no forsa armadas ba prende ema no oho ema, ne’e la loos, se nune’e violensia nunka mais para, violensia ne’e sai fali kultura iha ita nia rain, kuandu sai ona kultura susar tebes nia atu para.

.