Deputadu Pedro Husu Governu Implementa Programa: “Inacio Moreira: Governu AMP No Agora Hanesan De’it i Laiha Diferensa”

.

Notisia Husi TVTL - Segunda-Kalan, 27 Agustu 2012

Deputadu Pedro da Costa husu ba Governu atu implementa programa tuir orsamentu ne’ebe mak aprova iha tinan ida ne’e.

Pedro da Costa hato’o asuntu ne’e, relasiona ho preokupasaun komunidade kona ba infraestrutura Bee moos ne’ebe seidauk la’o.

Deputadu ne’e informa katak, Governu tenki implementa programa prioridade ne’ebe defini ona iha orsamentu Jeral do estado ba tinan 2012 hodi fo benefisiu ba povu iha baze.

“Parlamentu Nasional ezizi ba sira (Governu) atu implementa orsamentu ne’ebe aprova ona,” dehan Pedro da Costa.

Entertantu, Deputadu Bancada Opozisaun Inacio Moreira hateten katak, Governu agora no uluk laiha diferensia, tamba ne’e, lalika hein programa hotu maibe identifika programa ne’ebe ba interese nasional no fo benefisiu ba povu.

“Ne’e hakarak hateten deit katak, governu AMP no Governu agora laiha diferensa, diferensa saida nian? Primeiru Ministru Senor Xanana nafatin, Ministru no sekretariu Estadu mos sira mak nafatin hela deit, labele mai hateten fali diferensa Governu ida ba Governu seluk ita halo konfuzaun informasaun deit ba ita nia povu,” dehan Inacio Moreira.

Plenaria Parlamentu Nasional iha segunda-feira ne’e, deputadu husi FRETILIN kestiaona ba promosaun membru PNTL no mos seguransa iha rai laran.

.