Deputadu David Diaz ‘Mandati’ Ezizi Governu: “Tenki Muda Sistema Pagamentu Ba Funsionariu”

.

Jornal Timor Post - Kuarta-Feira, 29 Agustu 2012

Reprezetante povu iha uma fukun Parlamentu Nasional husi Bancada Opozisaun FRETILIN husu ba governu atu halo mudansa ba sistema pagamentu salariu ba funsionariu sira, tanba durante ne’e funsionariu sira ba forma hanesan atu ba komuniaun.

“Hau husu ba Sekretariu do Estadu ba asuntu parlamentar nian, atu hato’o ba Ministru kompotente atu halo mudansa ba mekanismu pagamentu ne’e,” dehan Deputadu Mandati iha uma fukun PN foin lalais ne’e.

Nia hatutan, iha tempu Indoensia no Portugues nian, funsionariu simu osan iha ida-idak nia servisu fatin, maibe to’o iha ukun aan oin seluk, funsionariu sira ba forma fali iha loron laran hanesan ema atu ba simu ransu ruma.

Ba kestaun n’e, tuir observasaun ne’ebe Diario ne’e nota katak, wainhira iha loron ikus fulan ida nian, funsionariu barak maka forma naruk iha Banku Nasional Komersiu Timor-Leste, ne’ebe fo impaktu mos ba movimentasaun transporte publiku.

.